I.
Amors e jois e liocs e temps
mi fan tornar lo sen en derc
d'aquel joi c'avia l'autr'an
can chassava lebre a bou:
era·m va meils d'Amors e peis
car ben am, d'aizo·m clam astrucs,
ma non-amatz ai nom enquers
s'Amors no vens son dur cor e·l mieus precs.
II.
Cel que totz bes pert a essems
mestier l'es que ric segnor cerc
per restaurar la perd'e·l dan,
que·l paubre no·il valri'un uo:
pero m'ai ieu chauzit en leis
don anc non ac lo cor ni·ls oils clus
e pliu·t, Amors, si la·m conquers,
treuas tostemps ab totas fors dels dets.
III.
Pauc pot hom valer de joi sems:
per me·l sai que l'ai aut berc,
car per un sobrefais d'afan
don la dolor del cor no muou...
e s'ab joi l'ira non foreis
tost m'auran mei paren faducs,
pero tal a mon cor convers
qu'en leis amar volgra morir senecs.
IV.
No sai on tan si'en Dieu frems,
hermita ni monge ni clerc,
com eu sela de cui chan,
e er proat anz de l'an nou:
liges soi seus meilz que demeis,
si·m for'eu si fos reis o dutz,
tant es en leis mos cors esmes
que, s'autra·n voil ni·n deing, donc si'eu secs.
V.
D'aizo que ai duptat e crems
creis ades e meillur e·m derc,
que·l reproers c'auzi antan
me dis que tan trona tro pluou,
e s'ieu mi pec cinc anz o seis
beleu, can sera blancs mos sucs,
jauzirai zo per qu'er sui sers,
c'aman preian s'afrancha cor ufecs.
VI.
De loncs sospirs e de greus gems
me pot trar cela cui m'aerc
c'ades, sol per un bel semblan,
m'ai mogut mon chantar tot nou.
Contramon vau e no m'encreis,
car gen mi fai cujar mos cucs:
cor, vai sus! ben ai si·t sofers:
sec tan qu'en lieis cui encobi no·t pecs.
VII.
Anz er plus vils aus non es fers
c'Arnauz desam leis on esfer manz necs.