I.
Au renouvel de la douçour d'esté,
que resclarcist la dois par la fontainne
et tuit sunt vert bois et vergier et pré
et li rosiers en mai florist et grainne,
lors chanterai, quar trop m'avra grevé
ire et esmais que j'ai au cuer prochainne,
et fins amis a tort ochoisonez
est mout souvent de legier esfreez.
II.
Voirs est qu'amours m'a outre loi mené,
maiz mout m'est bel qu'a son plaisir me mainne,
quar, se Dieu plest, encor me savra gré
de mon travaill et de ma longe painne;
maiz paour ai que ne m'ait oublié
par le conseill de la fausse gent vainne,
dont li tors est couneüs et provez,
que ja sanz mort n'en quit estre eschapez.
III.
Douce dame, quar m'otroiez, pour dé,
un douz reguart de vous en la semainne!
Si atendrai par ceste seürté
joie d'amours, se mes eürs le mainne.
Souvieigne vous con laide cruauté
fet qui ocit son lige home demainne!
Douce dame, d'orgueill vous desfendez,
ne trahissiez vos bienz ne vos biautez!
IV.
Tant ai d'amours mon fin cuer esprouvé
que ja sans li n'avrai joie certainne;
tant par sui mis tout a sa volenté
que nus travauz mon desir ne refrainne;
quant pluz me truis pensif et esgaré,
pluz me confort as biens dont ele est plainne;
et vous, seigneur, qui proiez et amez,
faites ausi, se joïr en volez!
V.
Douce dame, mout m'ont achoisoné
faus recreant et lor parole vainne,
qu'en lonc espoir m'ont si desconforté:
prez ne m'ont mort (Diex lor doint male estrainne!);
et, maugré eus, vous ai mon cuer doné,
plain de l'amour qui ja n'en iert lontainne;
tant s'est en vous finement esmerez
qu'ainc si loiauz ne fu quis ne trouvez.
VI.
Fuiez, chansons, ja ne m'i reguardez!
par mon seigneur noblet vous en alez
VII.
et dites li de male hore fui nez
qui touz jours aim et ja n'i iere amez!