I.
Sens atente de guerredon
M'otroi a ma dame servir;
Puis que toute s'entencïon
A si tournée a moi haïr
Qu'ele m'ocit a desreson.
Ja Dieus mes ne m'i dont joïr
De riens, fors que de tost morir;
Qu'autrement ne me puet faillir
L'ire dont el set l'ochoison.
II.
Grant mestier a de guerredon
Qui ainc ne fina de servir,
Et g'i ai si m'entencïon
Qu'il m'en covient mon bien haïr;
Por ce si tieng a desreson
De toz jors priier sens joïr;
Mains aim tel vie que morir,
Qu'a ce viaus ne puis je faillir;
Si en ai loial ochoison!
III.
Mout tieng a cruel la prison
Dont fins amis ne puet issir;
Por ce s'ai mon cuer a felon
Qui son mal quist por moi traïr,
Or n'i voi autre raençon
Fors que d'atendre et de sofrir
Les maus, dont nus ne puet garir
Fors au trichier et au mentir;
Mais n'i morrai se loiaus non.
IV.
Deus! tant me plait ceste prison
Que ja voir n'en queïsse issir;
Mais li losengeor felon
Qui se poinnent de moi traïr
N'en vuelent prendre raençon;
Lor cuers ne le porroit sofrir.
Ainsi ne le puis je garir,
Quant au trichier et au mentir
Ne penroie se ma mort non.
V.
Onc por rien ne me vueil garder
Que plus n'aie amé et priié
(Et sens trichier et sens fausser)
L'Amor qui tel soin m'a leissié.
Se les dous parz d'ainsi amer
Ne me tout, bien est sens pitié;
Ou viaus doint ma dame congié
Du felon penser retorner
Qu'ele a por ma mort comencié.
VI.
Bien deüst ma dame garder
A ce que j'ai cinc ans proié;
Se je li vousisse fausser,
Pieça que l'eüsse lessié.
Mais tant la vueil de cuer amer
Que ja n'avra dou cors pitié;
Espoir sil fes sens son congié;
Mais grief sera a retorner
Amors, puis qu'ele a comencié.
VII.
Ci puet ma chançon definer
D'Amors, qui si m'a essaiié.
Le conte Joffroi ai priié,
Que n'ait envie de fauser;
Mort serïon par son pechié.