| I | |
| Ialoie lautrier errant sanz conpaignon. seur mo(n) palefroi pensant; afere une chancon. quant ioi ne sai con ment lez un buisson; la uoiz du plus bel enfant conques ueist nus hon. et nestoit pas enfes si; neust quinze anz (et) demi. nonques nule riens ne ui de si gente facon. |
J’aloie l’autrier errant sanz conpaignon. Seur mon palefroi, pensant a fere une chançon, quant j’oï, ne sai conment, lez un buisson, la voiz du plus bel enfant c’onques veist nus hon; et n’estoit pas enfes si n’eüst quinze anz et demi, n’onques nule riens ne vi de si gente façon. |
| II | |
| Uers li men uois maintenant; mis la areson. bele dites moi con ment; pour dieu uous auez non. et ele saut tout errant a son baston; se uous uenez plus auant ia auroiz la ten con. sire finez uous de ci. nai cure de tel ami. car iai mult plus biau choisi quen claime robecon. |
Vers li m’en vois maintenant, mis l’a a reson: «Bele, dites moi conment, pour Dieu, vous avez non». Et ele saut tout errant a son baston: «Se vous venez plus avant ja avroiz la tençon; sire, fuiez uous de ci! N’ai cure de tel ami, car j’ai mult plus biau choisi qu’en claime Robeçon». |
| III | |
| Quant ie la ui esfreer si durement; quel ne mi daigne esgarder ne fe re autre senblant. lors con mencai apenser con faitem(en)t; ele me porroit amer et chan gier son talent. aterre lez li massis. quant plus regart son cler uis. tant est plus mes cuers espris qui double mon talent. |
Quant je la vi esfreer si durement qu’el ne mi daigne esgarder ne fere autre senblant, lors conmencai a penser confaitement ele me porroit amer et changier son talent. A terre lez li m’assis. Quant plus regart son cler vis, tant est plus mes cuers espris, qui double mon talent. |
| IV | |
| Lors li pris ademan der mult belement; que me daignast esgarder et fere au tre senblant. ele conmence a plorer et dist itant; ie ne uos puis esgarder ne sai qualez querant. uers li me trais si li di. ma bele pour dieu m(er)ci. ele rist si respondi nou faites pour la gent. |
Lors li pris a demander mult belement que me daignast esgarder et fere autre senblant. Ele conmence a plorer et dist itant: «Je ne vos puis esgarder ne sai qu’alez querant». Vers li me trais, si li di: «Ma bele, pour Dieu merci!» Ele rist, si respondi: «Nou faites pour la gent!» |
| V | |
| Deuant moi lors la montai de mainte nant; et trestout droit men alai uers un bois uerdoia(n)t. aual les prez regardai soi cri ant; dels pastors parmi un ble qui uenoient huiant. et leuerent un haut cri. assez fis plus que ne di. ie lales si men foi; noi cure de tel gent. |
Devant moi lors la montai de maintenant et trestout droit m’en alai vers un bois uerdoiant. Aval les prez regardai, s’oï criant dels pastors parmi un blé qui venoient huiant, et leverent un haut cri. Assez fis plus que ne di: ie la les, si m’en foï, n’oi cure de tel gent. |