I.
Cuens, je vous part un gieu par aatie
et si m'en met seur vostre jugement:
dui chevalier aiment chascuns s’amie;
li uns des deus aime mult loiaument,
et li autres guile mult durement.
Li quels tret pis, se Deus vous beneïe,
ou li loiaus ou cil qui triche et ment
et deçoit?
Dites m'en droit,
sire, tout orendroit
et si prenez l’un des deus maintenant,
et j'avrai l’autre partie
et respondrai avenant,
selonc voz diz, en chantant.
II.
Mesire Guis, mult me siet la partie,
mès du meilleur vous dirai mon senblant;
que loiautez n'iert ja par moi perie,
oncor la bé a tenir mon vivant.
Li desloiaus ne bien ne mal ne sent,
qu'endormiz est en sa vil tricherie,
si ne li chaut li quels chiés voist avant,
tort ou droit,
quant il deçoit
celi qui tout metroit,
et cuer et cors, en son conmandement.
Dehez ait qui plus s’i fie!
Qui bien a et bien atent
ja n’avra son cuer dolent.
III.
Cuens, je sai bien auques vostre pensee;
ne savez pas d’amors jusq'au doloir:
toutes dolors sont vers celi rousee
d'ome qui aime et n'en puet joie avoir;
et je pri Dieu q'il vous face savoir
quel mal cil sent qui bien aime a celee.
Adonc primes savroiz vos bien de voir,
ce m'est vis,
que mult est pris
cil qui aime et trait pis
Que li autres, qui guile a son pooir
Et a toute honor quitee.
Endroit moi, pour nul avoir
ne vueil avoir tel voloir.
IV.
Messires Guis, touz jorz ert honoree
la bone amor la ou ele est, por voir!
Mains trait de mal qui toute a sa pensee
en la joie dont muevent tuit savoir.
La fole gent n’i puënt remanoir,
ainz dit chascuns que trop atent qui bee.
Fins amerres doit touz jorz mentevoir
son cler vis
et son douz ris,
qui li est Paradis,
Si ne se doit pas puis de li doloir
dont atent joie honoree.
Qui s’i fet apercevoir,
tuit l’en doivent mal voloir.
V.
À Gilon pri q'il en die le voir,
qui a tort de la meslee
ne qui s’en doit plus doloir.
Die le por pès avoir!
VI.
Sor dan Perron m’en met a son voloir,
qui du vis resenble espee,
qui nos face remanoir
et voir die a son pooir.