I.
Tout autresi con fraint nois et yvers,
que vient estez, que li douz tens repaire,
deüst fraindre li faus prïerres sers
et fins amis amender son afaire;
et je dot mult q'il ne me soit divers,
se il touz est aus autres debonaire;
mès tant me fi la ou biautez repaire,
q'aïmanz sui, se tout n'est vers moi fers.
II.
Par Dieu, Amors, ainz serai vains et pers
et plus destroiz que cil qui porte haire
que ne sache de vos un autre vers
que n'est icil qui tant me fet mal traire.
Ne soiez pas con li cines c'adès
bat ses cisniaus, quant il lor doit melz faire,
quant il sont grant et il vient a son aire,
et a premiers les a norriz et ters.
III.
Nule paine, qui guerredon atent;
c'est aese, qui bien le set entendre.
Car qui adès veut fere son talent,
on i puet bien mainte chose reprendre.
Tel chevauchent mult acemeement
qui ne sevent leur grant honor atendre.
En Amors a maint guerredon a prendre
dont el puet bien son dru faire joiant.
IV.
Certes, dame, bien cuit a escïent
n'i doi perdre, se ne m'i puis desfendre.
De vos amer me va Amors hastant,
que je me claim vaincu sanz plus coup rendre;
et vos tenez le baston en estant,
si fetes tant c'on ne vos puist reprendre
et je vos vueil avuec itant aprendre:
se m'ocïez, n'i gaaigniez noient.
V.
Enviz prent nus nul oiselet au broi
q'il nel mehaint ou ocie ou afole,
et Amors prent tout autretel conroi
de mult de ceus qu'ele tient a s'escole;
gent les atret, si leur moustre pour quoi;
a premiers est chascuns si liez q'il vole.
Mult m'atrest bel, mès ci me faut parole,
car vos dirai de qui ce poise moi.
VI.
Chanson, va t'en cele part ou je voi
douz cuer au mains, que que die en parole;
et se mi oeil sont loing, ice m'afole,
mès je me fi tout adès en ma foi.