I.
Mauvès arbres ne puet florir,
ainz seche touz et va crollant;
et hons qui n'aime, sanz mentir,
ne porte fruit, ainz va morant.
Flor et fruit de cointe senblant
porte cil en qui nest amors.
En ce fruit a tant de valors
que nus nel porroit elligier,
que de touz maus puet alegier.
fruit de Nature l'apele on
or vos ai devisé son non.
II.
De ce fruit ne puet nus sentir,
se Deus ne le fet proprement.
Qui a Dieu amer et servir
done cuer et cors et talent,
cil queut du fruit trestout avant,
et Deus l'en fet riche secors.
Par le fruit fu li premiers plors,
quant Eve fist Adam pechier;
mès qui du bon fruit veut mengier
Dieu aint et sa Mere et son non,
si queudra le fruit de seson.
III.
Seigneur, de l'arbre dit vos ai
de Nature, de qu'amors vient;
du fruit meür conté vous ai
que cil quieut qui a Dieu se tient;
mès dou fruit vert me resouvient
qui ja en moi ne meürra:
c'est li fruiz en qu'Adans pecha.
De ce fruit est plains mes vergiers:
dès que ma dame vi premiers,
oi de s'amor plain cuer et cors,
ne ja nul jor n'en istra fors.
IV.
Bien cuit dou fruit ne gousterai
que je cueilli, ançois m'avient
si conme a l'enfant, bien le sai,
qui a la branche se soustient
et entor l'arbre va et vient
ne ja amont ne montera;
ensi mes cuers foloiant va.
Tant par est granz mes desirriers
que je en tieng mes granz maus chiers,
si sui afinez con li ors
vers li, qui est touz mes tresors.
V.
Deus! se je pouoie cueillir
du fruit meür de vous amer,
si com vous m'avez fet sentir
l'amor d'aval et conparer,
lors me porroie saouler
et venir a repentement.
Par vostre douz conmandement
me donez amer la meillor:
ce est la precïeuse flor
par qui vos venistes ça jus,
dont li Deables est confus.
VI.
Mere Dieu, par vostre douçor
du bon fruit me donez savor,
que de l'autre ai je senti plus
c'onques, ce croi, ne senti nus!
VII.
Phelipe, lessiez vostre error!
je vos vi ja bon chanteor.
Chantez, et nos dirons desus
le chant Te Deum laudamus.