I.
Apres mon vers vueilh sempr’ ordre
una chanson leu per bordre
en aital rima sotil;
mas ges non ai’ us de tordre
si·m pert ma par ni·m ten vil
q’ieu vas mon miels no·m apil.
II.
Qar? No sai qant m’ai a viure,
per qe mon cors al cor liure;
e sapcha·n guidar dretz fil
mos volers, e non s’ature
mas en valen seinhoril;
q’om no·s iau de son cortil.
III.
Soven pens q’ailhors mi derga,
e pueis Amors ten sa verga,
qe·m n’a ferit de grieus pols,
e·m ditz c’ap mals no·m aerga;
q’ieu non sui escarniz sols
q’escarnitz fon ia N’Aiols.
IV.
Cil qi m’a vout trist-alegre
sap mais qu’i vol sos ditz segre
qe Salamos ni Marcols
de fatz ric ab ditz entegre:
e cai leu d’aut en la pols
qi·s pliu en aitals bretols.
V.
Qe·m val q’ailhor non puesc creire?
Q’anc no frais copa de veire
plus tost q’Amors frainh e rom —
mas si·l plaz qe·l mal cor meire
il sap lieu soudar ses plom; —
mas ha mi soudat trop som.
VI.
Viatz m’assajer’ a volvre
s’Amors me volges absolvre;
mas, pres en loc de colom,
me fai de seschas envolvre,
qe no·m gic penr’ un sol tom,
e m’apella per mon nom.
VII.
— Mal dic; tainh qe m’en peneda —
Non! — Per qe? — Mos cors m’o veda. —
Amors me tol qe·m ten trist. —
Qi·t tol, non cug qe t’o reda. —
So·m tol qe plus l’aurai qist —
No·t tol so q’anc non agist.
VIII.
Si aic gaug, qe·m tol e·m merma
qar mos talenz no·m aserma.
Ben ai fol talan, per Crist,
qar mos cors miels no s’aferma
en lai on faz gen conqist
q’en sai on ai mon dan vist.
IX.
A Dieu prec qe mos precs auja:
q’el vueilh’ e don q’ieu m’en gauja
lai on son volgutz amics!
Qar — ja·l sieus fins cors s’esflauja —
totz autres trop noms plus rics,
e non o dic ges enics.
X.
Cel Dieus qi fes terr’ e aiga,
caut e freig, gent clergu’ e laiga:
afol sels qe desabrics;
c’ama voluntat veraiga
e ab cubertz fals presics,
fan dan als drutz e destrics.
XI.
Domna, franca res veraiga
eu que·us sui verais amics
a vos mi ren totz antics.
XII.
Plus qe ja fenis fenics
non er q’ieu non si’ amics.