I.
Pos trobars plans
es volguz tan
fort m’er greu s’i non son sobrans:
car ben pareis
qi tals motz fai
c’anc mais non foron dig cantan,
qe cels c’om tot jorn ditz e brai
sapcha, si·s vol, autra vez dir.
II.
Mos ditz es sans,
don gap, ses dan.
Per tal joi soi coindes e vans,
qe mais val neis
desirs q’ieu n’ai
d’una qe anc no m’ac semblan
(pels sainz c’om qer en Verzelai!)
d’autre joi c’om puesca jauzir!
III.
Son ben aurans!
C’ar, per talan
solamen, so francs et humans,
de dir ves leis
ben, ni·m fas gai.
Qe·m val si per lieis trag mal gran?
Si lo mal q’en trac no sap lai,
mi eis voil d’aitan escarnir.
IV.
Ben so trafans
q’eu eis m’engan,
car dic aiso tan qe vilans!
— Cals pros me creis
s’ieu lo mal trai
per leis, s’il no sapia l’afan?
— No m’es doncs pros e be no·m vai
si·m pens qe tan ric joi desir?
V.
Mos volers cans
qe·m sal denan
me fai creire qe futz es pans.
Tan aut mespreis
mon cor, car sai
q’enfol. M’aurei donc faz l’efan?
— Tot voll cant vei. — Respeit segrai.
— Respeitz loncs fai omen perir.
VI.
Sains Julians!
Con vauc torban!
Soi serrazis o crestians?
Qals es ma leis?
Non sai. Qe jai
me posca, de so qe·il deman,
et atrestan tost, Dieus, si·l plai,
co fes vin d’aiga, devenir.
VII.
Pauc soi certans!
(Ves qe·us reblan,
domna.) De vos so molt londans!
Anc no·m destreis
Amors tan mai;
per q’ieu non creiria d’un an
c’aissi·us ames per negun plai,
si bes no m’en degues venir.
VIII.
Astrius e ma chanso vos man,
qe dos sautz si rics ar essai;
lo ters aut on plus pot om dir.