I.
Als durs, crus, cozens, lauzengiers
— enojos, vilans, mals parliers —
dirai un vers que m’ai pensat;
que ja d’als no·i aura parlat,
qu’a pauc lo cor no m’esclata
d’aisso qu’ieu ai vist e proat
de lur malserva barata.
II.
E dirai vos de lur mestiers
si cum selh qu’en es costumiers
d’auzir e de sufrir lur glat.
Si·m peza, mas non er laissat
qu’ieu ab mal dir no·ls combata;
e ja del plus no·m sapchon grat
qar mos cors totz non los mata.
III.
Lauzenjador fan encombriers
als cortes et als dreituriers
e a cellas qu’an cor auzat;
e quecx per aquel eis mercat
a l’autre cobre et aplata
son verguonhos avol barat —
aissi son de fer’escata!
IV.
Per que·y falh totz bos cavaliers
que·ls cre; q’us non l’es plazentiers
mas per qu’en traga mielhs son at;
qu’il pesson, ist malaurat!
Pus d’als non val una rata
des que·l fara so voluntat
o·lh dira lauzenja grata.
V.
D’autres n’i a que van estiers,
que·s fa quecx cortes ufaniers;
que per outracujar mot fat,
o cuj’ aver mielhs guazanhat
cel qu’a plus la lengua lata
en dir de partir l’amistat
de cels en cui Jois s’afata.
VI.
Que·ls plus pros e·ls plus gualaubiers
vei de lauzenjar prezentiers;
e pes me d’ome c’a amat:
cum pot far amador irat?
Mas ges (qui qu’en crit ni·n glata!)
Non amon tug cil qu’an baizat —
so sap sidons Na Lobata.
VII.
Tal cug’ esser cortes entiers
qu’es vilans dels quatre ladriers,
et a·l cor dins mal ensenhat;
plus que feutres sembla sendat
ni cuers de bou escarlata
non sabon mais que n’an trobat —
e quecx quo·s pot calafata.
VIII.
Pos non aus mos durs deziriers
dir, tan tem que·l dans fos dobliers,
maldirai los en luec d’aurat;
e Dieus — quar fara caritat —
los maldiga e·ls abata
sai, e pueys lai en Neiron prat
on recebran deliurata.
IX.
Palharet, non ges grans palhiers,
d’aquest vers ompli tos paniers
e porta tot ton col cargat
a·N Girart, de cuy ai peccat,
a Perpinhan part Laucata.
E di·l (per que m’aia comprat)
qu’el cassa·s e·n desbarata.
X.
Ben chant (qui que s’en debata)
dels lauzengiers qu’an Joi baissat
del suc entro la sabata.
XI.
Joglar, s’eu ja cautz sabata,
qi no·us ve pauc a cavalgat,
ni sap per qe se debata.