I.
Assaz m’es belh
que de novelh
fassa parer
de mon saber
tot plan als prims sobresabens
que van comdan
qu’ab sen d’enfan
dic e fatz mos captenemens;
e sec mon cor
e·n mostri for
tot aisso don ilh m’es cossens.
II.
Qui qu’en favelh,
lo m’es pro belh
de mon saber:
qu’en sai mielhs ver
(sitot no suy mout conoyssens)
que·l trop parlan
que van comdan
“Folhs es. — Non es. — Si es sos sens.”
Qu’ar tost salh for
ab belh demor
gen motz leugiers, cortes, valens.
III.
Ab sen novelh
dic e favelh
mon saber ver
e·l fas parer
lay on tanh que sia parvens;
que son enfan
li mielhs parlan
vas me; e sai qui·m n’es guirens,
ab que·m demor
gen dins mon cor
si que·l dir no·m passa las dens.
IV.
Don d’amar dic:
qu’am si ses tric
lieys qu’amar deg,
que·l miels adreg
(s’eron sert cum l’am finamens)
m’irion sai
preguar hueymai
que·ls essenhes cum aprendens
de ben amar;
e neus preguar
m’en venrion dompnas cinc cens.
V.
Ben ai cor ric
plus qu’ieu non dic
e tan adreg
que ducx ni reg
no prez, si no·m prez’ eissamens;
a cuy no·m play,
ieu suy de say;
et amarai mos bevolens.
No vuelh preguar,
que miels m’er car
q’om mi prec, qu’ieu prec manhtas gens.
VI.
L’enojos tric,
sian del ric
sobeiran reg
maudig, e deg
dels janglos parliers maldizens!
Gic m’en hueymai,
que·l dir no·m plai
tan m’es lur mentaure cozens!
Que s’il tug car
meron, amar
no·ls poiria, que·l cor m’en vens.
VII.
Pauc sap d’amar
qui tem preguar
Deu, qu’el maldia los manens.
VIII.
E·t voill pregar,
vers, ab diz car
que lai en Urgel te prezens,
IX.
Ab talen car
si·m fai amar.
E·l bon esper qu’eu n’ai guirens!