I.
Ar resplan la flors enversa
pels trencans rancx e pels tertres.
Cals flors? Neus, gels e conglapis
que cotz e destrenh e trenca;
don vey morz quils, critz, brays, siscles
en fuelhs, en rams e en giscles
mas mi ten vert e jauzen Joys
er quan vey secx los dolens croys.
II.
Quar enaissi m’o enverse
que bel plan mi semblon tertre,
e tenc per flor lo conglapi,
e·l cautz m’es vis que·l freit trenque,
e·l tro mi son chant e siscle,
e paro·m fulhat li giscle.
Aissi·m suy ferm lassatz en joy
que re non vey que·m sia croy —
III.
mas una gen fad’ enversa
(cum s’eron noirit en tertres)
que·m fan pro pieigz que conglapis;
q’us quecx ab sa lengua trenca
e·n parla bas et ab siscles;
e no y val bastos ni giscles
ni menassas; — ans lur es joys
quan fan so don hom los clam croys.
IV.
Qu’ar en baizan no·us enverse
no m’o tolon pla ni tertre
dona, ni gel ni conglapi,
mas non·poder trop en trenque.
Dona, per cuy chant e siscle,
vostre belh huelh mi son giscle
que·m castion si·l cor ab joy
qu’ieu no·us aus aver talan croy.
V.
Anat ai cum cauz’ enversa
sercan rancx e vals e tertres,
marritz cum selh que conglapis
cocha e mazelh’ e trenca:
que no·m conquis chans ni siscles
plus que folhs clercx conquer giscles.
Mas ar — Dieu lau — m’alberga Joys
malgrat dels fals lauzengiers croys.
VI.
Mos vers an — qu’aissi l’enverse,
que no·l tenhon bosc ni tertre —
lai on hom non sen conglapi,
ni a freitz poder que y trenque.
A midons lo chant e·l siscle,
clar, qu’el cor l’en intro·l giscle,
selh que sap gen chantar ab joy
que no tanh a chantador croy.
VII.
Doussa dona, Amors e Joys
nos ajosten malgrat dels croys.
VIII.
Jocglar, granren ai meynhs de joy!
Quar no·us vey, en fas semblan croy.