Peire d'Alverne si fo de l'evesquat de Clarmon. Savis hom fo e ben letratz, e fo fils d'un borges. Bels et avinens fo de la persona. E trobet ben e cantet ben, e fo lo premiers bons trobaire que fon outra mon et aquel que fez los meillors sons de vers que anc fosson faichs:
De josta·ls breus jorns e·ls loncs sers.
Canson no fetz, qe non era adoncs negus cantars appellatz cansos, mas vers; qu'En Guiratz de Borneil fetz la premeira canson que anc fos faita. Mout fo onratz e garsitz per totz los valenz barons que adonc eran e per totas las valenz dompnas, et era tengutz per lo meillor trobador del mon, tro que venc Guirautz de Borneill. Mout se lausava en sos cantars e blasmava los autres trobadors, si qu'el dis de si en una cobla d'un sirventes qu'il fez:
Peire d'Alverne e a tal votz
Que canta de sobr' e de sotz,
E siei son son douz e plasen;
E pois es maïstre de totz,
Ab q'un pauc esclaris sos motz,
Qu'a penas nuillz hom los enten.
Longuamen estet e visquet al mon, ab la bona gen, segon qu'en dis lo Dalfins d'Alverne, que nasquet en son temps; e pois el fetz penitensa e mori.