I.
Dieus, vera vida, verais
e dreitz endrech clers e lais,
e nomnatz salvaire Cristz
en latin e sobr’ebrais,
e natz e pois mortz vius vistz
e sorsetz, don laissetz tristz
aquels que pois fezetz gauzens.
II.
Seigner reis, eu failli fals,
don es issitz tant grans mals,
en consir et en ditz durs,
et en fols faitz enfernals
ab brondis d’estrains aturs,
et en tals talens tafurs:
mi·us rend colpables penedens.
III.
De tot so q’ieu fesi anc,
e si non ai cor ferm franc
de dir so que·m agra ops,
prec a vos al cal m’en planc,
per cui tant fon fizels Iops,
que non gardetz mos tortz trops,
ma gratia·m sia sofrens.
IV.
Q’ieu no·m sent si savis sai
que posca conqerre lai
lo reing on hom set ni fam
ni freig non a ni esmai,
si·ll vostra vertuz, cui clam,
no·m don’ esfortz q’ieu desam
lo ioi d’aqest segle giquens.
V.
Qe·m fai faillir vas vos sol,
per que·l cors m’intr’ en tremol;
e si·m servatz mos forfaitz
tro lai al derrier tribol
q’enans no·ls m’aiatz fag fraitz,
Seigner, ges bons no·m n’es plaitz,
si doncs merces no·ls sobrevens.
VI.
De vos, q’estorsetz Sydrac
d’ardent la flam’ e Misac
ensems et Abdenago
e Daniel dinz del lac
e Ionas ab utero
e·lz tres rics reis contr’Ero
e Susann’ entre·ls fals guirens.
VII.
E paguetz, Seigner sobrans,
tanz de dos peis e cinc pans,
e·l Lazer suscitetz vos
q’era ia quatredians;
de vos ac per bel respos
son serf salv Centurios,
e gitetz del mon mains turmens.
VIII.
E fesetz de l’aiga vin
al covit d’Archeteclin,
ed autres meravills moutz,
don hom carnals non sap fin
ni no·s n’entremet’ estoutz;
e parlet per vos lo voutz
de Lucha, rics reis resplandens.
IX.
E fezetz la terra e·l tron
e tot qant es ni anc fon
d’un sol seing el sol el cel,
e confondetz Faraon,
e detz als fills d’Israel
laich e brescha, mann’ e mel,
e dampnetz per serpen serpens.
X.
C’als vostres fon requies,
qand vos plac que Moyses
encausses lai el desert;
e solsetz las mans e·ls pes,
quand us angels l’ac espert,
saint Peire e·l fezetz cert
dels vostres destrics destreignens.
XI.
E·us quesiron la lor pleps
tro lai on es mons Oreps,
aucien dinz Bethleem,
qan vos en fugi Ioseps
en Egipte, so sabem;
e pois en Iherusalem
venguetz, e·ntre·ls vostres parens
XII.
a Nazareth, reis Ihesus.
Pair’ en tres personas us
e fills e sainz esperitz,
ador en trinitat sus
q’etz cims e rams e razitz
e Deus e de qant q’es guitz:
siatz me, si·us platz, defendens.
XIII.
E sai obr’ e bon talan
mi detz e far entretan
que, qan venretz en las nius
iutgar lo segl’ el iorn gran,
doutz Dieus, no·m siatz esquius
e q’ieu, clars reis regum pius,
m’en an ab los gausitz gauzens.
XIV.
E, Seigner, no m’oblidetz gens,
que ses vos non sui sostenens;
e seing m’en vostre nom crezens:
in nomine patris e filii et spiritus sancti. Amen.