| raembauts daurenga | Raembauts d’Aurenga |
| I | I |
| Er sespan la flors enuersa pels trenchans rancs e pels te res cals fregz nieus giels e con glapis. qe cos e destrei(n)g e trenca. don uei mortz qels critz braits chiscles. Et foilleran et en giscles mais mi ten uert et iauzent iois. er can uei secs los dolens crois. |
Er s’espan la flors enversa pels trenchans racs e pels teres - Cals ? Fregs, nieus e conglapis qe cos e destreing e trenca, don vei mortz qe.ls critz, braits, chiscles et foill eran et en giscles, mais mi ten vert e iauzent iois er, can vei secs los dolens crois. |
| II | II |
| Car enaisi o enuersa qeil bel plan me semblon tertre. E teing p(er) flors lo con glapi. el cautz mi par qel freitz trenqe e trop mi son chant e chiscle. e parom foilljat li giscle. sim soi lassatz e ferms ad ioi. qe re non uei qem sia croi. |
Car enaisi o enversa qe il bel plan me semblon tertre e teing per flors lo conglapi, e.l cautz mi par qe.l freitz trenqe e trop mi son chant e chiscle, e paro.m foilljat li giscle : si.m soi lassatz e ferms ad ioi qe re non vei qe.m sia croi. |
| III | III |
| Mas una gent fadaenuersa qem semblo nirit en tertres me fan trop peigz qel con glapis. cusqecs ab sa lenga tre(n)ca. e par lon bas (et) ab chiscles e noi ual bastos ni glisches. ni menassas anz lor es iois can fan so p(er) com los ten crois. |
Mas una gent fada, enversa, qe.m semblo nirit en tertres me fan trop peigz qe.l conglapis c’us quecs ab sa lenga trenca e parlon bas et ab chiscles, e no i val bastos ni glisches ni menassas, anz lor es iois can fan so per c’om los ten crois. |
| IV | IV |
| Qar en baisan nous euersa. nomo tolon ual ni tertre. do(n)na ni gel ni conglapi. mas nom poders trop entronqe. do(n)na p(er) cui chant e giscle. uostre bel oill mi son giscle qem chastion. sil cor ab ioi qeu non aus auer talans croi. |
Q’ar en baisan no.us eversa no m’o tolon val ni tertre, donna, ni gel ni conglapi, mas no.m poders trop entronqe : donna per cui chant e giscle, vostre bel oill mi son giscle qe.m chastion si.l cor ab ioi, q’eu non aus aver talans croi. |
| V | V |
| Anait ai com causa enuersa. totz te(m)pz cercan uals e tertres. marritz con hom cui conglapi canç nom conqes chanz ni chiscles plus qel fel clers (con) qer giscles. mas er laus deu mal berga iois. malgrat dels fals lauzengiers crois. |
Anait ai com causa enversa, totz tempz cercan vals e tertres, marritz con hom cui conglapi destreing e mal entrenca, c’anç no.m conqes chanz ni chiscles plus qe.l fel clers conqer giscles - mas ar, laus Deu !, m’alberga iois malgrat dels fals lauzengiers crois. |
| VI | VI |
| An mos chanz caissi enuersa. e no lteignion ual ni tertre. Lai on om no sent con glapi. ni a poder freigz qe trenche. amidonz lo chant el chiscle. clar qins el cor lhintrol gische. cels qil sab gent chantar ab ioi qe nos fai a chantador croi. |
An mos chanz, c’aissi enversa, e no.l teignion val ni tertre, lai on om no sent conglapi, ni a poder freigz qe trenche : A midonz lo chant e.l chiscle clar q’ins el cor lh’intro.l gische cels qi.l sab gent chantar ab ioi, qe no.s fai a chantador croi ! |
| VII | VII |
| Dousa donna amors e iois. nos ten ensems malgrat dels crois. | Dousa donna amors e iois nos ten ensems malgrat dels crois ! |
| VIII | VIII |
| Ioglar ganre nai meins de ioi. car nous uei en fas semblan croi | Ioglar, ganren ai meins de ioi, car no.us vei en fas semblan croi ! |