I.
Tant ai Amors servie et honoree
bien m'i deüst mon servise merir,
mès ma dolor n'iert ja guerredonee,
qu'a moi ne puet joie d'Amors venir.
Hé, Deus! Conment me porroie esjoïr,
quant je esloing la riens qui plus m'agree!
II.
Se li miens cors se part de sa contree,
ne s'en veut pas pour ce li cuers partir:
g'en port mon cors, mès g'i lès ma pensee.
Qui près aime, de loig ne puet haïr;
ne près ne loig ne puet vrais cuers guenchir,
ne ja amors n'iert de mon cuer sevree.
III.
Ele est et bele et bone et bien senee;
s'ele a s'amor m'i daignoit consentir,
adonc seroit ma dolor oublïee.
Je l'amerai, s'en devoie morir,
car plus me plest pour li amer languir
que par autre fust ma dolor sanee.
IV.
En pou d'eure fu bien ma mort juree
sanz moi avant defier et garnir.
Si oeil riant, sa face coloree,
ses biaus parlers, qui tant plest à oïr,
m'i sorent bien decevoir et traïr,
qu'encontre aus trois n'a ma reson duree.
V.
Toute biauté est en li aünee;
sousfrete en ot Deus a moi enbelir.
Et quant biauté est toute a li donee,
Deus, qui me fist a la biauté faillir,
m'a doné cuer verai pour vous servir,
s'il vous plesoit, douce dame honoree!
VI.
Amis verais ne se puet resortir,
car ne font pas bone amor amenrir
ne cors lointains ne longue demoree.