I.
Une dolor enossee
s'est dedenz mon cuer
que je ne puis oster fuer
por nule riens qui soit nee;
c'est dolor d'amors,
dont n'ai confort ne secors,
ainz cuit ce que j'aim me hee.
II.
Dolenté desesperee
doit on geter puer,
ne je ne vueil a nul fuer
qu'ele soit en moi entree.
Melz aim mes dolors
sousfrir et les granz poors,
que sousfrir vaint consieurree.
III.
Dame, ainz ne m'osai conplaindre
a vous tant ne quant,
que vostre biauté tres grant
fet mon sens el cuer estaindre,
si que n'ai pouoir
de vous dire mon voloir;
por tant puet touz jorz remaindre.
IV.
Bien voi que n'i puis ataindre
par nul mandement,
n'en qier, voir, parler avant
ne aillors ne m'en vueil plaindre;
ainz atendrai, voir,
sa merci de dur voloir,
se pitiez ne la fet fraindre.
V.
N'os entrer en son repaire,
tant dout son corroz.
As sospirs et as sangloz
m'en tieng, que n'en puis plus faire;
ainz vois aorant
le leu et merci criant
conme a un haut saintuaire.
VI.
Dame, cui j'aim tant,
quelque bien en delaiant
me donnez por plus atraire.
VII.
Bernart, cil qui sent
mes maus et merci n'atent
trop a ennui et contraire.