|
I
|
|
|
Comtessa de Dia
A chantar mer daso quieu non uolria
Tan mi rancur de lui cui soi amia Car ieu lam mais de nuilla ren que sia ues lui nom ual merses ni cortezia ni ma beutatz ni mos pretz ni mos sens cautressi sui enganade traia com degresser si fos desauinens. |
Comtessa de Dia A chantar m'er da so qu'ieu non volria, tan mi rancur de lui cui soi amia car ieu l'am mais de nuilla ren que sia; ves lui no·m val merses ni cortezia, ni ma beutatz ni mos pretz ni mos sens, c'autressi sui enganad' e traia com degr'esser si fos desavinens. |
|
II
|
|
|
D aissom conort car anc non fis faillensa
amicct ues uos per nuilla captenensa ans uos am mais non fes seguis ualensa E platz mi molt que sieu damar uos uensa Lo mieus amicct car es los plus ualens me faitz ergueill en digz et en paruensa E si es uos francct ues totas autras gens. |
D'aisso·m conort car anc non fis faillensa, amicct, ves vos per nuilla captenensa, ans vos am mais non fes Seguis Valensa, e platz mi molt que sieu d'amar vos vensa, lo mieus amicct, car es los plus valens; me faitz ergueill en digz et en parvensa, e si es vos francct ves totas autras gens. |
|
III
|
|
|
M erauill me com uostre cors sergueilla
Amicct ues me per cai rason quem dueilla. Non es ges dreitz cautramors uos mi tueilla Per nuilla re queus diga nius acueilla. E membre uos cal fol comensamens De nostre amor ia Dami dieus no uueilla Quen ma colpa sial departimens. |
Meravill me com vostre cors s'ergueilla, amicct, ves me, per c'ai rason que·m dueilla; non es ges dreitz c'autr'amors vos mi tueilla per nuilla re que·us diga ni·us acueilla; e membre vos cal fo·l comensamens de nostre amor, ia Damidieus no vueilla qu'en ma colpa sia·l departimens. |
|
IV
|
|
| Proesa grans quel uostre cors saisina E lo ric pretz caues men... Cuna non sai londana ni vesina Si uol amar ues uos non siaclina Mas uos amicct es ben tant conoisens Que ben deuetz conoiser la plus fina E membre uos dels nostres couinens |
Proesa grans qu'el vostre cors s'aisina e lo ric pretz c'aves m'en... c'una non sai londana ni vesina si vol amar ves vos non si' aclina; mas vos, amicct, es ben tant conoisens que ben devetz conoiser la plus fina, e membre vos de·ls nostres covinens. |
|
V
|
|
| Valer mi deu mos pretz e mos paratges E ma beutatz e plus mos fins coratges. Per quieu uos man lai on es uostrestages Esta chanso que me sia mesatges. E uueil saber lo mieus bels amicct gens Per que mestais tan fers fels ni tan saluatges. Non sai si ses ergueills o mals talens. |
Valer mi deu mos pretz e mos paratges e ma beutatz e plus mos fins coratges, per qu'ieu vos man lai on es vostr'estages esta chanso que me sia mesatges; e vueil saber lo mieus bels amicct gens, per que m'estais tan fels ni tan salvatges, non sai si s'es ergueills o mals talens. |
|
VI
|
|
| Mas aitan plus uueill queus digas mesatges Que trop dergueil fai mal a maintas gens. |
Mas aitan plus vueill que·us digas mesatges, que trop d'ergueil fai mal a maintas gens. |