Tu sei qui

Edizione diplomatica

Schede primarie

Bernard.
AMors qe uos es ueiaire.
Trobaz uos fol mais qe me.
Uos uolez qeu sia amaire.
Et qe ges non trob merce.
Cho qem comandaz a faire.

Farai qaissim coue.
Ma uos no istagues be.
Qem fachez tot iorn mal traire.

Eu am la plus de bonaire.
Del mond mais qe nulla re.
Mas ela no mama gaire.
No sai per qe sesdeue.
Et qant eu men cuit estraire.
E non puos qamors mi te.
Traiz soi per bona fe.
Amors ben oposc retraire.

Eu sai ben raison (et) causa.
Per qe puosc midon mostrar.
Qe ges longamen non ausa.
Enues amor contrastar.
Qar amors uenz tota causa.
Qem uenqet de leis amar.
Altretal re pot leis far.
En una petita paosa.

Granz enoiz (et) granz naosa.
De toz te(m)ps merce cridar.
Lamors qe meses enclausa.
Non pois cobrir ni celar.
Las mos cors no dorm ni pausa.
Ne pot en un loc estar.
Ni eu no posc ges durar.
Sel dolors no ma soausa.

Ab amor mes acontendre.
Qe no men puosc estener.
Qen tal loc mi fai entendre.
Don eu gran ioi non esper.
En tal loc mi fara prendre.

Canc non ai cor ni uoler.
Mas eu non ai ges poder.
Qem puosca damor defendre.

Pero amors sol deissendre.
Lai on li uen a plaisser.
Et pot men guiderdon rendre.
Don mautrait (et) dels doler.
Qe mais non posca ualer.
Sol midons me des ueder.
O en parolas entendre.

Do(m)pna nulllz hom no sap dire.
Lo fin cor nil bon talan.
Qeu ai qan de uos consire.
Qe mais ren non amai tan.
Ben magran mort li sopsire.
Do(m)pna passat a un an.
Si non fos cent bel senblan.
Qe fai doblar mon martire.