I.
Par Dieu, sire de Champaigne et de Brie,
Je me sui mult d’une riens merveilliez,
que je voi bien que vous ne chantez mie,
ainz estes pou jolis et renvoisiez;
car me dites pour quoi vous le lessiez.
Estez revient et la sesons florie,
que tous li monz doit estre bauz et liez;
et bien sachiez que mains en vaudrïez,
s'Amors s’estoit si tost de vos partie.
II.
Phelipe, n’ai de chançon fere envie,
que d’Amors sui partiz et esloigniez.
Je l’ai lonc tens honoree et servie,
n'onques par li ne fui jor avanciez,
si ne vueil plus de li estre chargiez.
Par tout la voi et remese et faillie,
Mult est ses nons et ses pris abessiez.
Du tout m'en part, et vous si ferÏez,
se ne volez demorer en folie.
III.
Sire, a grant tort m'avez Amors blasmee
et du partir faus conseil me donez.
S’Amors avez mal servie et guilee,
pour ce n’est pas ses nons deshonorez,
que d’Amors vient toute honor et bontez.
Qui bien la sert en fez et en pensee
ne puet faillir ne remaigne honorez,
que sanz Amors n’est nus a droit loëz,
et cil puet bien po valoir qui n'i bee.
IV.
Phelipe, Amors est chose forsenee,
ne nus ne doit sieurre ses volentez.
Tant la conois tricheresse prouvee
que je pris pou li et ses faussetez,
Ainz me sui si de li servir lassez
Que j'en hé ceus par qui ele est loëe.
Pour ce vous pri que jamès n’en chantez,
Que vous serez touz jorz par li guilez,
si com je sui, qui ainz n’en oi soudee.
V.
Sire, trop est Amors et douce et chiere,
et trop m'en plest li servirs et li nons.
Servirai la, sanz moi retrere arriere,
d'uevre et de cuer et de fere chançons.
Quant li plera, s’en avrai guerredons,
que je la sai loial et droituriere.
S’ele tant est blasmee des felons,
des desloijaus qui qierent achesons,
et mult m'est bel, quant il la truevent fiere.
VI.
Phelipe, Amors est fausse et trop legiere;
oncor diroiz que voire est ma resons.
Quant vos savroiz conoistre sa maniere,
ne tendroiz pas les partiz a bricons.
Trop conois bien Amors et ses façons:
A l’encontrer vos iert de bele chiere,
Puis troveroiz guiles et traïsons;
et en la fin ne vaut noient li dons:
trop la covient conquerre a grant proiere.
VII.
Sire, dehet qui crerra voz sermons!
A fine Amor m'otroi, qui m'a semons,
et maintendrai ma pensee pleniere.
VIII.
Phelipe, oncor vendra autre sesons.
Aiïns qu'en aiez conquis nul bon respons,
me diroiz vous qu’Amors n'est pas entiere.