I.
Lançan son passat li giure
e no·i reman puois ni comba,
et el verdier la flors trembla,
sus el entrecim on poma,
la flors e li chan e·il clar quil
ab la sazon douss’ e coigna
m’enseignon c’ab ioi m’apoigna,
sai al temps de l’ intran d’abril.
II.
Ben greu trob’om ioi desliure,
c’a tantas partz volv e tomba
fals’Amors, que no s’asembla
lai on leiautatz asoma;
q’ieu non trob ies doas en mil
ses falsa paraulla loigna,
e puois c’a travers non poigna
e no torne sa cartat vil.
III.
Totz lo plus soms en va hiure
ses muiol e ses retomba
cui ill, gignos’, en cel embla
la crim qe·il pend a la coma
e plus pres li brui de l’auzil
on plus gentet s’en desloigna;
e·l fols cre mieills d'una moigna
car a simple cor e gentil.
IV.
Ses fals Amors cuidiei viure,
mas ben vei c'un dat mi plomba
qand ieu mieills vei q'il m'o embla;
car tuich li legat de Roma
no son ies de sen tan sotil;
que Na Devisa messoigna,
que tant soaument caloigna,
que men posca falsar un fil.
V.
Qui Amor sec, per tal·s liure:
cogul tenga per colomba
s’ ill o ditz ni ver li sembla,
fassa·il plan del Puoi de Doma;
qan d'el plus prop es tant s'apil;
si co·l proverbis s'acoigna,
si·l trai l'uoill, el puois lo·il oigna;
sofr'e sega ab cor humil.
VI.
Ben conosc ses art d'escriure
que es plan o que es comba,
q’ ieu sai drut que si assembla
don blasm’a leis, el col groma;
q’ieu n’ai ia perdut ric cortil,
car non vuoill gabs ab vergoigna
ni blasme ab honor loigna,
per que ieu loing son seignoril.
VII.
Bertran, non cre de sai lo Nil
mais tant de fin ioi m’apoigna
de sai on lo soleils poigna
tro lai on lo soleils plovil.