I.
En cest sonet coind’e leri
fauc motz e capuig e doli,
que serant verai e cert
qan n’aurai passat la lima;
q’Amors marves plan’e daura
mon chantar, que de liei mou
qui pretz manten e governa.
II.
Tot iorn meillur et esmeri
car la gensor serv e coli
el mon, so·us dic en apert.
Sieus sui del pe tro q’en cima,
e si tot venta·ill freid’aura,
l’amors q’inz el cor mi plou
mi ten chaut on plus iverna.
III.
Mil messas n’aug e·n proferi
e·n art lum de cer’ e d’oli
que Dieus m’en don bon issert
de lieis on no·m val escrima;
e qan remir sa crin saura
e·l cors q’es grailet e nou
mais l’am que qi·m des Luserna.
IV.
Tant l’am de cor e la queri
c’ab trop voler cug la·m toli
s’om ren per ben amar pert.
Q’el sieus cor sobretracima
lo mieu tot e non s’eisaura;
tant a de ver fait renou
c’obrador n’a e taverna.
V.
No vuoill de Roma l’emperi
ni c’om m’en fassa apostoli,
q’en lieis non aia revert
per cui m’art lo cors e·m rima;
e si·l maltraich no·m restaura
ab un baisar anz d’annou
mi auci e si enferna.
VI.
Ges pel maltraich q’ieu soferi
de ben amar no·m destoli,
si tot me ten en desert,
c’aissi·n fatz los motz en rima.
Pieitz trac aman c’om que laura,
c’anc plus non amet un ou
cel de Moncli n’Audierna.
VII.
Ieu sui Arnautz q’amas l’aura,
e chatz la lebre ab lo bou
e nadi contra suberna.