I.
En breu brisara·l temps braus,
e·ill bisa busin’ els brancs
qui s’entreseignon trastuich
de sobre rams claus de fuoilla;
car no·i chant’ auzels ni piula
m’enseign Amors q’ieu fassa adonc
tal chan que n’er segons ni tertz
ans prims d’afrançar cor agre.
Amors es de pretz la claus
II.
Amors es de pretz la claus
e de proes’ us estancs
don naisson tuich li bon fruich,
s’es qui leialmen los cuoilla;
q’un non delis gel ni niula
mentre qe·s noiris el bon tronc;
mas si·l romp trefans ni culvertz
peris tro leials lo sagre.
III.
Faillirs esmendatz es laus;
et eu sentim n’ams los flancs
que mais n’ai d’amor ses cuich
que tals q’en parl’ e·is n’orguoilla;
que pieitz mi fa·l cor de friula.
Mentr’ella·m fetz semblan embronc,
mais volgr’ ieu trair pen’els desertz
on anc non ac d’auzels agre.
IV.
Bona doctrina e soaus
e cors clars, sotils e francs
m’an d’Amor al ferm conduich
de lieis don plus vuoill qe·m cuoilla;
car si·m fo fer’ et estriula
er iauzimens breuia·m temps lonc,
q’ il m’es plus fin’ et ieu lieis certz
que Talant’e Meleagre.
V.
Tant dopti que per non·aus
devenc sovens niers e blancs;
si m’a·l seus desirs forsduich
no sap lo cors trep o·is duoilla;
mas Iois que d’esper m’afiula
m’encolpa car no la somonc;
per q’ ieu sui d’est prec tant espertz
non ai d’als talen neis magre.
VI.
Pensar de lieis m’es repaus,
e traga·m ams los huoills crancs
s’a lieis vezer no·ls estuich;
e·l cor non crezatz q’en tuoilla,
car orars ni iocs ni viula
no·m pot de leis un travers ionc
partir.... c’ai dig? Dieus, tu·m somertz
o·m peris el peleagre!
VII.
Arnautz vol sos chans si’ofertz
lai on doutz motz mou en agre.