I.
Anc ieu non l’aic, mas ella m’a
totz temps en son poder Amors,
e fai·m irat, let, savi, fol,
cum cellui q’en re no·is torna,
c’om no·is deffen qui ben ama;
c’Amors comanda
c’om la serv’ e la blanda,
per q’ieu n’aten
soffren,
bona partida
qand m’er escarida.
II.
S’ieu dic pauc, inz el cor m’esta
q’estar mi fai temen paors;
la lenga·is feign, mas lo cors vol
son don dolens si soiorna;
q’el languis ma no s’en clama,
q’en tant a randa
cum mars terra garanda
no a tant gen
presen
cum la chausida
q’ieu ai encobida.
III.
Tant sai son pretz fin e certa
per q’ieu no·m puosc virar aillors;
per so fatz ieu qe·l cors men dol,
que qan sols clau ni s’aiorna
eu non aus dir qui m’aflama;
lo cors m’abranda
e·ill huoill n’ant la vianda,
car solamen
vezen
m’estai aizida:
ve·us qe·m ten a vida!
IV.
Fols es qui per parlar en va
qier cum sos iois sia dolors!
Car lausengier, cui Dieus afol,
non ant ies lenguet’ adorna:
l’us conseill’e l’autre brama,
per qe·is desmanda
Amors tals fora granda.
Mas ieu·m deffen
feignen
de lor brugida
e am ses faillida.
V.
Pero guazen mi ten e sa
ab un plazer de que m’a sors,
mas mi no passara ia·l col
per paor q’il no·m fos morna,
q’enqera·m sent de la flama
d’Amor, qi·m manda
que mon cor non espanda;
si fatz, soven
temen,
puois vei per crida
maint’amor delida.
VI.
Maint bon chantar levet e pla
n’agr’ ieu plus fait, si·m fes socors
cella qe·m da ioi e·l mi tol;
q’er sui letz, er m’o trastorna,
car a son vol me liama.
Ren no·il desmanda
mos cors, ni no·il fai ganda,
ans franchamen
li·m ren:
doncs, si m’oblida
Merces es perida.
VII.
Mieills-de-Ben ren,
si·t pren,
chanssos, grazida,
c’Arnautz non oblida.