I
Ben vueill que sapchon li pluzor
d'un vers, si es de bona color,
qu'ieu ai trait de mon obrador,
qu'ieu port d'aicel mestier la flor --
ez es vertatz! --
e puesc ne trair lo vers auctor
quant er lasatz.
II
Eu conosc ben sen e folor,
e conosc anta ez honor,
ez ai ardiment e paor;
e si·m partetz un joc d'amor,
no soi tan fatz
no sapcha triar lo meillor
d'entre·ls malvatz.
III
Eu conos be sel que be·m di
e sel que·m vol mal autressi,
e conosc be celui que·m ri;
e s'ill pro s'azauton de mi,
conosc assatz
qu'atressi dei voler lur fi
e lur solatz.
IV
Ben aia celui que·m noiri
que tan bon mester m'Escari
que anc a negun non failli:
qu'ieu sai joguar sobre coisi
a totz tocatz;
mas ne sai de nuill mon vezi,
qual que·m vejatz.
V
Dieu en laus e Saint Julia:
tant ai apres del joc dousa
que sobre totz n'ai bona ma;
mas ja qui conseill me querra,
no l'er vedatz,
ni nuils de mi non tornara
desconseillatz.
VI
Qu'ieu ai nom: "maistre serta":
ja m'amigu'a nueg no m'aura
que no·m vueill'aver no m'aura
que no·m vueill'aver l'endema;
qu'ieu soi be d'est mestier, so·m va,
tant ensenhatz
que ben sai guazanhar mon pa
en totz mercatz.
VII
Pero m'auzetz tan gabier
qu'ieu no fos rausatz l'autrier,
que joguav'a un joc grossier
que·m fo trop bos al cap premier
tro fo taulatz;
quan gardei, no m'ac plus mestier,
si·m fo camjatz.
VIII
Mas ela·m dis un reprovier:
"Don, vostres datz son menudier
ez ieu revit vos a doblier!"
Fis m'ieu: "Qui·m dava Monpeslier
non er laisatz!"
E levei un pauc son taulier
ab ams mos bratz.
IX
E quan l'aic levat lo taulier,
espeis los datz;
e·ill dui foron cairat, vallier,
e·l tertz plombatz.
X
E fi·ls ben ferir al taulier
e fon jogatz.