I.
Phelipe, je vous demant:
dui ami de cuer verai
sont qui aiment loiaument,
bacheler novel et gai.
Li uns a tout son talent,
li autres est a l'essai.
Qui doit plus venir avant,
li amez ou cil qui prie?
II.
- Cuens, sachiez certainement:
li amez est fors d'esmai
et pour c'est il plus en grant
de melz valoir, bien le sai;
quant plus a, et plus enprent
et plus fet bien sanz delai;
ne cil ne puet valoir tant
qui qiert merci et aïe.
III.
- Phelipe, cil qui reqiert
doit melz valoir par raison,
que toute bontez affiert
a atendre a si haut don.
Cil s'esforce qui conqiert,
mès cil qui en est a son
jamès partir ne se qiert
por nul pris d'avec s'amie.
IV.
- Cuens, ja li prïerres n'iert
qui n'ait duel et soupeçon,
et pensee au cuer le fiert
conment il avra pardon;
més cil qui a ce q'il qiert
ne pense s'a valoir non:
joie son pris li porqiert
et sa dame, qui l'en prie.
V.
- Phelipe, plus doit valoir
cil qui veut entendre a li
et qui atent main et soir
de sa dame avoir merci.
Cist pensers li fet avoir
le cuer vaillant et hardi.
Trop fet cil mains son pouoir
qui a sa joie aconplie.
VI.
- Cuens, sachiez vos bien de voir
que ci avez vos falli:
s'on vaut mains por joie avoir,
dont sunt tout amant honi.
Se cil qui se doit doloir
vaut melz de joieus ami,
dont fesons dames savoir
par tot c'on ne ainme mie.
VII.
- Phelipe, je faz savoir
a Auberon, mon ami,
q'il nos en die le voir,
u sa langue soit honie!
VIII.
- Cuens, a Rodrigue le Noir
mant de par vos et li pri
q'il nos en mant son voloir
qui a droit de la partie.