I.
En chantant vueil ma dolor descouvrir,
Quant pardu ai ce que plus desirroie.
Las! si ne sai que puisse devenir,
Que m'amorz est ce dont j'espoire joie.
Si m'estovra a tel dolor languir,
Quant je ne puis ne veoir ne oir
La bele rien a qui je m'atendoie.
II.
Quant m'en souvient, grief en sont li sospir,
Et c'est toz jorz, ne ja n'en recrerroie.
Por li m'estuet mainte gent obeïr,
Que je ne sai se nus va cele voie,
Més se nus puet a bonne amor venir
Par bien amer et loiaument servir,
Je sai de voir qu'encor en avrai joie.
III.
Mi chant sont tuit plain d'ire et de dolor
Por vos, Dame, que je ai tant amee,
Que je ne sai se je chant ou je plor.
Einsi m'estuet sosfrir ma destinee.
Més, se Dieu plaist, encor verrai le jor
Qu' Amors sera changiee en autre tor,
Si vos donra vers moi meillor pensee.
IV.
Souvaigne vos, Dame, de fine Amor,
Que loiautés ne vos ait obliee!
Que je me fi tant en vostre valor
Qu'adés m'est vis que merci ai trouvee,
Et neporquant je muir et nuit et jor.
Or vos doint Dieus por oster ma dolor,
Que par vos soit m'ire reconfortee!
V.
Dame, bien vueil que vos sachiez de voir
C'onques par moi ne fu més dame amee,
Ne ja de vos ne me quier més mouvoir;
Mon cuer i ai et m'ententeatornee.
Je n'ai mestier, Dame, de decevoir,
Que de tel mal ne me sueil pas doloir.
Ne m'esfreez, s'il vos plaist, a l'entree!
E.
Chançon, va t'en, garde n'i remenoir!
Prie celui qui plus i a pooir
Que tu soies sovent par li chantee.