Arnautz Daniels
Ans que sim reston de brancas
Sec ni despoillat de foilla
farai c'Amors m'o comanda
breu chanson de rason loinga
qui gen m'adueg de las ars de ses cola
tant sai que∙l cors faz restar de suberna
e mos bous es plus corens non es lebres.
E tu c'o aus non t'afrancas
per respieg c'amar o no∙t voilla
sec cil te fui ni∙t fai ganda
que greu er c'om no∙i apoinia
qui s'afortis de preiar mas non cola
que∙n passarai part las palus d'Userna
mons pelegrins laics lei on cor Ebres.
Ab razos coindas e franchas
m'a mandat q'eu no∙men tuoilla
ni serva autra ni blanda
pois tant fan c'ab si m'aconga
e∙m di que flor no∙l semble de viola
que∙s camia leu si tot nonca s'iverna
ans per s'amor sis laurs o genebres.
S'ieu n'ai passatz pons ni planchas
per lei cuidatz vos que∙m duoilla
non eu c'ab ioi ses viada
me sap far mecina coinga
baisam tenen e∙l cors si tot si vola
no∙s part dei lei que∙m cap d'ella e∙m governa
cors on qu'eu an de∙lleis no∙t part ni∙t sebres.
Que de Paris tro c'a Sanchas
genser no∙s vest ni∙s despuoilla
e sa valors es tan granda
qe semblaria mesoniga
ben vai d'Amor qe m'embrass'e∙m percola
e no∙m frei sis freitz ni gels ni buerna
ni∙m faz dolor nuls mals gota ni febres.
Dis tu c'aillors non t'estanchas
per autra que∙t deing ni∙t cuoilla
tos plaitz esquius e desmanda
sai e lai qui que∙t somoniga
qe ses clam faill qui si mezeis afola
e tu non far failla don hom t'esquerna
mas apres Dieu leis honors e selebros.
Qu'eu sui Arnautz del sim tro en la sola
eu non voill ges sens leis aver Luserna
ni∙l seignoriu del renc per on cor Obres.