| Jaufres rudels de blaia. | Jaufres Rudels de Blaia. |
| I | |
| Lan qan li iorn son lonc enmai. mes bels doutz chans dauzels deloing. e qand me sui partitz delai. Remembram dun amor deloing. uau de talan embroncs e clis. si quic chans ni flors dalbespis. nom platz plus q(ue) liuerns gelatz. |
Lanqan li iorn son lonc en mai m'es bels doutz chans d'auzels de loing e qand me sui partitz de lai remembra·m d'un'amor de loing; vau de talan embroncs e clis si quic chans ni flors d'albespis no·m platz plus que l'iverns gelatz. |
| II | |
| Iamais damor non guizarai. si nom gau destamor deloing. q(ue) gensor ni meil lor non sai. uas nuilla part nipres ni loing. tant es sos pretz uerais e fis. qel lai el renc dels sarrazis. fos ieu p(er) lieis chaitius clamatz. |
Iamais d'amor non guizarai si no·m gau d'est'amor de loing, que gensor ni meillor non sai vas nuilla part ni pres ni loing. Tant es sos pretz verais e fis qe lai el renc dels sarrazis fos ieu per lieis chaitius clamatz. |
| III | |
| Iratz egauzens menpartrai. qan uei rai cest amor deloing. mas non sai coras laueirai. Car trop son nostras terras loing. assatz hia portz ecamis. ep(er) aisso non sui deuis. mas tot sia cu(m) adieu platz. |
Iratz e gauzens m'en partrai qan veirai cest amor de loing, mas non sai coras la veirai car trop son nostras terras loing, assatz hi a portz e camis e per aisso non sui devis... mas tot sia cum a Dieu platz! |
| IV | |
| Bem parra iocs qan li qerrai. p(er) amor dieu lalberc deloing. esalieis platz al begarai. pres delieis sibem sui deloing. adoncs parral parlamens fis. qand drutz loindas er tant uezis. cab bels digs gauzirai solitz. |
Be·m parra iocs qan li qerrai per amor Dieu l'alberc de loing, e s'a lieis platz albegarai pres de lieis si be·m sui de loing; adoncs parra·l parlamens fis qand drutz loindas er tant vezis c'ab bels digs gauzirai solitz. |
| V | |
| Ben tenc loseignor p(er)uerai. p(er)quiu uerrai lamor deloing. mas p(er)unben que men eschai. nai dos mals car tant mes de loing. ai car me fos lai peleris. siq(ue) mos fustz emos tapis. fos pels sieus bels oues remiratz. |
Ben tenc lo Seignor per verai per qu'iu verrai l'amor de loing, mas per un ben que m'en eschai n'ai dos mals car tant m'es de loing. Ai! Car me fos lai peleris si que mos fustz e mos tapis fos pels sieus bels oues remiratz. |
| VI | |
| Dieus qui fetz tot cant ue ni uai. efor met cest amor deloing. mi don poder q(ue)l cor ieu nai. qenbreu ueia lamor deloi(n)g. ueraiamen en loncs aizis. si que la cambra el iardis . mi resembles totz temps palatz. |
Dieus qui fetz tot cant ve ni vai e formet cest amor de loing, mi don poder que·l cor ieu n'ai q'en breu veia l'amor de loing, veraiamen en loncs aizis: si que la cambra el iardis mi resembles totz temps palatz. |
| VII | |
| Uer ditz qui mapella lechai. ni desiron damor deloing. car nuills autre iois tant nom plai. cum gauzimens da mor deloing. mas so q(ue)u uuoill mes ta(n)t ais. q(ue)naissim fadet mos pairis. qieu ames enon fos amatz. |
Ver ditz qui m'apella lechai ni desiron d'amor de loing, car nuills autre iois tant no·m plai cum gauzimens d'amor de loing. Mas so qu'eu vuoill m'es tant ais qu'enaissi·m fadet mos pairis: q'ieu ames e non fos amatz! |
| VIII | |
| Mas so qieu uuoill mes tant ais. Totz sia mauditz lopairis. qem fadet qieu non fos amatz. |
Mas so q'ieu vuoill m'es tant ais. Totz sia mauditz lo pairis qe·m fadet q'ieu non fos amatz! |