|
Arnautz de Maruelh Pus en Raimuns en Turc Malecx defen n’Aynan e sos decx, e ieu serai vielhs e canecx ans que m’acort en aitals precx don puesca venir tan grans pecx: al cornar l’agra mestiers becx ab que trasques del cor los crecx; e pueys pogra leu venir secx que fums es fort que mi.ntre.ls plecx. |
|
|
Ben l’agra ops que fos becutz e.l becx que fos loncx e agutz, quar lo corn es fers e pelutz que se tapon en la palutz, e anc un iorn non estet mutz. De prop li relhen lo lis glutz per so me dis: «corn, l'ai rendutz» e qui sabora lais condutz iamais no.s cove sia drutz. |
|
|
Quar pro.i agra d’azauz assays, de pus leus que valgran mais; e si en Bernatz s’en estrais, per Crist, anc no.i fes que savays, si paor li.n pres ni esglays: quar si.l trobes de vos lo rays, si l’escaudet al colh e.l cays; e no.s cove que dona bays selh que corna lo corn putnays. |
|
|
Ges so, sapchatz, ieu no m’acort als digz d’en Raimun de Durfort, quar si cornessa per deport leu trobera fors contrafort e la pudor agra.l tot mort, que ol pus fort que fems en ort; e qui que ja lo.n desconort, Bernatz de Cornes, fai gran tort. Lauzatz ne Dieu que.us n’a estort! |
|
|
Ben es estortz de gran perilh quar retrag for’a vostre filh e a tugh aquels de Cornilh; si la cornes en l’efonilh, en loc fer don no.m meravilh, entre l’esquin’e.l pentenil, lai on se sangna de rovilh, que gran cor a que.s n’estendilh: ia tan no sabra de grondilh no.l compisses lo grunh e.l cylh. |
|
|
Bernatz de Cornes vos’estrilh al corn cornar ses gran dozilh ab que trauc la pen’e.l pentilh: pueys poira cornar ses perilh. |