Arnautz Daniels
L'aur'amara fa∙ls brueills brancutz
clairir qe∙l dous'espeiss'ab fueilz
el∙s letz becx dels aucels ramencs
ten balbs e mutz pars e non pars
per qu'ieu m'efforz de far e dir plazers
a mainz perar lei que m'a virat bas d'aut
don tem morrir si∙ls affanz no∙m'asoma.
Tan fon clara ma prima lutz
d'eslir lei doncx cre∙l cors los oills
non pretz necs mans doz aigonencs
d'autra s'es dutz rars mos preiars
pero deportz m'es ad auzir
Volers bos motz se grei
de∙llei don tant m'azaut
c'al sieu servir soi del pe tro la coma.
Si m'anpara cil qe∙m tralutz
d'auzir si qe∙s de pretz capduoillz
dels quetz precs c'ai dedinz a rencs
l'er fors rendutz clars
mos pensamenz qu'ieu fora mortz mas fa∙m sofrir
l'espres qe∙ill prec que∙m brei
c'aisiom ten let e baut
qe d'als ausir non val iois una poma.
Dousa cara ab totz aibz volgutz
sofrir m'er per vos mains orgoills
car etz decs de totz mos defens
don ai mains brutz pars e gabars
de vos no∙m tortz ni∙m fai partir
avers c'ans non amei
ren tant ab mens d'ufaut
ans vos desir plus qe Dieus sil de Doma.
Amors gara soi ben vencutz
ch'ausir tem far si∙m desacuoills
tals d'etz precz que t'es miels que∙t trencs
qu'eu soi fis drutz cars e non avars
mal cors ferms fortz men fai sofrir
mans vers c'ab tot lo nei
m'agr'obs un bais al caut
cor refrezir que no∙i val autra goma.
Ara∙t para çans e condutzformir al rei que t'er escuoillz
car pretz secs chai lai on es doblencs
e mantengutz dars e maniars
de ioi la∙t porz son anel mir
si∙s ders q'anc non estei
Iorn d'Aragon qu'el saut
no∙i volgues ir mas sai m'an clamar roma.
Fatz es la crotz
q'el cor remir totz sers
lei cui dompnei ses parsonier Arnaut
q'en autr'arbir non es fort m'entent'a soma.