I.
Contr’amor vau durs et enbroncs
per que mos chans es trop loindas,
q’ieu non sui tant leugiers ni vas
qe ja longamen atenda
so don non posc esser segurs;
que de dompna, pois ment sos jurs,
non sap drutz en qe s’enprenda.
II.
E de qe·m dei alegrar doncs
s’ab lieis, on es pretz sobeiras,
non puosc trobar ditz seguras
ni ai poder qe·l car venda,
si·m fai tortz ni semblans escurs?
Q’el mon non es rocha ni murs
que contra liei mi deffenda.
III.
Ab fals digz et ab termes loncs
fant dompnas de cortes vilas,
c’us non es tant francs ni humas
qe·l coratge no·ill n’ensenda
qand autre pren los sieus endurs;
mas ieu no·n fatz tant grans rancurs
ni pois mort non qier esmenda.
IV.
Ara mentre q’es l’ombr’ els joncs
e lo temps es clars e doussas,
devon dompnas ben far certas
celz qe·il plai q’en lieis s’entenda;
e s’ieu n’ai ditz mainz motz tafurs,
merces que fraing mainz fortz aturs
prec que ma dompna mi renda.
V.
Si cum la ros’ entre mil troncs
es genser flors qe d’autres gras,
entre fals lausengiers trafas
estai midonz en sa tenda,
c’us no·il ten dan d’aquestz perjurs;
gen comensset ab bos agurs
pretz que per lor non dissenda.
VI.
Venganssa de colps ni d’estoncs
non es d’amor ni de sas mas,
c’ab bels digz avinens e plas
taing que pros dompna contenda;
que, pos trop tenss’ ab braus digz durs,
non es sos pretz tant cars ni purs
c’om alques no la reprenda.
VII.
Dompna·m don Dieus que defenda
de Miraval las tors e·ls murs,
pois vostre talans es tant durs
que no·us platz q’encar lo·us renda.