I.
D’autra guiz’ e d’autra razon
m’aven a chantar que no sol,
e no·us cugetz que de mon dol
esper a far bona chanson,
mas mestiers m’es qu’eu fassa merceiar
a mans, chantan leis que m’encolp’a tort,
qu’ieu n’ai lezer, qu’estiers non parl’ab tres.
II.
Merce dei trobar e perdon
si·l dreit usatges no·m destol
tal que de merceiar no·m tol.
Ia salvet merces lo lairon
quez autre bes no·l podia salvar;
ieu non ai plus vas ma vida cofort
que, s’il dreitz qu’ai no·m val, vailha·m merces.
III.
Donc ha hom dreg en amor? Non;
mas cujarion so li fol;
qu’el’ us encolpara, si·s vol,
quar li Frances no son Guascon
e quar la naus frais ans que fos a Bar.
Las! Per aital colpa sui pres de mort,
que d’als, per Crist, no sai qu’anc tort l’agues.
IV.
Ar conosc ieu e sap mi bon
c’om no·s part leu de so que vol
ans n’a cor plus humil e mol
sitot l’estrai un tems son don;
per me·us o dic, qu’anc non puec dezamar
selha que·m tolh del tot ioi e deport,
ans m’afortis ades on pieger m’es.
V.
Hueimais, senhor e companhon,
per Dieu, ans que del tot m’afol,
preiatz lieis don m’amors no·s tol
qu’en aia merce cum del son;
e diguas tug, pus ieu non l’aus nomnar:
bela, prendetz per nos n’Arnaut en cort
e no metatz son chantar en defes.