I.
Lo ferm voler q’el cor m’intra
no·m pot ies becs escoissendre ni ongla
de lausengier, qui pert per mal dir s’arma;
e car non l’aus batr’ab ram ni ab verga,
sivals a frau, lai on non aurai oncle,
iauzirai ioi, en vergier o dinz cambra.
II.
Qan mi soven de la cambra
on a mon dan sai que nuills hom non intra
anz me son tuich plus que fraire ni oncle,
non ai membre no·m fremisca, neis l’ongla,
aissi cum fai l’enfas denant la verga:
tal paor ai no·l sia trop de l’arma.
III.
Del cors li fos, non de l’arma,
e cossentis m’a celat dinz sa cambra!
Que plus mi nafra·l cor que colps de verga
car lo sieus sers lai on ill es non intra;
totz temps serai ab lieis cum carns et ongla,
e non creira chastic d’amic ni d’oncle.
IV.
Anc la seror de mon oncle
non amei plus ni tant, per aqest’arma!
C’aitant vezis cum es lo detz de l’ongla,
s’a liei plagues, volgr’esser de sa cambra;
de mi pot far l’amors q’inz el cor m’intra
mieills a son vol c’om fortz de frevol verga.
V.
Pois flori la seca verga
ni d’en Adam mogron nebot ni oncle,
tant fin’ amors cum cella q’el cor m’intra
non cuig fos anc en cors, ni eis en arma;
on q’ill estei, fors en plaz’, o dins cambra,
mos cors no·is part de lieis tant cum ten l’ongla.
VI.
C’aissi s’enpren e s’enongla
mos cors en lei cum l’escorss’ en la verga;
q’ill m’es de ioi tors e palaitz e cambra,
e non am tant fraire, paren ni oncle:
q’en paradis n’aura doble ioi m’arma,
si ia nuills hom per ben amar lai intra.
VII.
Arnautz tramet sa chansson d’ongl’e d’oncle,
a grat de lieis que de sa verg’a l’arma,
son Desirat, cui pretz en cambra intra.