Testo critico costituito sulla base di A
I. Gui d’Uissel, be·m pesa de vos
e car vos i volgra tornar
-per que sabetz d’aitals razos-
vuoill qe·m digatz si deu far egalmen 5
dompna per drut, qan lo qier franchamen,
cum el per lieis tot cant taing ad amor,
segon los dreitz que tenon l’amador.
II. Dompna Na Maria, tenssos
e tot cant cuiava laissar, 10
mas aoras non puosc estar
q’ieu non chant als vostres somos.
E respond eu a la dompna breumen
que per son drut deu far comunalmen
com el per lieis, si·s garda de ricor, 15
q’en dos amics non deu aver maior.
III. Gui, tot so don es cobeitos
deu drutz ab merce demandar
e dompna pot o autreiar,
mas be·n deu esgardar sazos. 20
E·l drutz deu far precs e comandamen
cum per amiga e per dompna eissamen,
e·il dompna deu a son drut far honor
cum ad amic, mas non cum a seignor.
IV. Dompna, sai dizon demest nos 25
que, pois que domna vol amar,
engalmen deu son drut onrar
pois engalmen son amoros.
E s’esdeven que l’am plus finamen,
e·l faich e·l dich en deu far aparen; 30
e si ell’a fals cor ni trichador,
ab bel semblan deu cobrir sa follor.
V. Gui d’Uissel, ges d’aitals razos
non son li drut al comenssar,
anz ditz chascus, qan vol preiar, 35
mans iointas e de genolos:
‘Dompna, voillatz q’eus serva franchamen
cum lo vostr’om’ et ella enaissi·l pren.
Eu lo iutge per dreich a trahitor
si·s rend pariers e·s det per servidor. 40
VI. Dompna, so es plaitz vergoignos
ad ops de dompna a razonar
que cellui non teigna per par
a cui a faich un cor de dos:
o vos diretz (e no·us estara gen) 45
que·l drutz la deu amar plus finamen,
o vos diretz q’il son par entre lor,
que ren no·il deu lo drutz mas per amor.