Tu sei qui

Edizione diplomatica

Schede primarie

Bernard.
LO rossignols sesbaldeia.
Iosta la flor el uerzan.

Et pren mes etals enueia.
Qe non puos mudar non chan.
Mas no sai de qe ne de cui.
Qar eu non am mi ni altrui.
Et faz esforz qar no sai faire.
Bos uers poi no soi amaire.

Mais a damor qi do(m)pneia.
Ab orgoill (et) ab enian.
Qe cil qi toz iorz merceia.
Nis uai tro homilian.
Qapenas uol amors celui.
Qe francs (et) fins si com eu soi.
Caizom tol tot mon afaire.
Canc no fui fals ni trichaire.

Aissi com lo rams se pleia.
La ol uenz lo uau menan.
Eu uas celui qim guerreia.
Per far toz iorn son coman.
A sos ops me gart (et) mestui.
Qe si non em amic andui.
Daltramor no mes ueiaire.
Qe iamais mos cors sesclaire.

Souen me retem plaideia.
Em uai ocaisos leuan.
Et qant il en ren felneia.
Ues mi en es tot lo dan.
Gen gaba de mi (et) dedui.
Qe deis son tort con dui lautrui.
Mas ben es uers qe laire.
Cuiia tuit sia sei fraire.

Hom no la ue qe no creia.
Sos bels oillz (et) son senblan.

Et no cre qela auer deia.
Felon cor ni mal talan.
Mas laiga qe soausa dui.
Es peiger qe cela qe brui.
Engan fa qi de bon aire.
Senbla (et) non es gaire.

De tot loc on ill esteia.
Me destoill en uau loignan.
Et per zo qeu no la ueia.
Pas li mos oillz claus denan.
Mas aichom seca (et) destrui.
Qar a mal legnai redui.
On mos oill li don atraire.
Sautre tort me saup retraire.

Cel sec amor(s) qi nos desdui.
Et cel encucha qi la fui.
Ben ai encor del estraire.
Tro qes ues midonz repaire.

En aissi fos pres com ge soi.
Mon aluernaz (et) foram dui.
Qe plus nos pogues estraire.
Dun bel ueder de bel caire.

Tristan seu nocaus uei gaire.
Mais uos am qeu no soill faire.