I.
Dieus, aydatz,
s’a vos platz,
senher cars
e dos e verays,
e vulhatz
que ab patz
lo jorns clars
e bels c’ades nays
nos abratz,
car solatz
e chantars
e voutas e lays
ay auzitz
d’auzels petitz
pels playssaditz.
L’alb’ e·l jorns
clars et adorns
ven. Dieus, aydatz!
L’alba par
e·l jorn vey clar
de lonc la mar
e l’alb’ e·l jorns par.
II.
Sus, levatz,
drutz c’amatz,
que sem pars
er bels jorns e gays;
e·l comjatz
sia datz
ab dous fars
et ab plazens bays.
Enselatz
e pujatz,
car l’estars
non es bos hueymays,
que·ls maritz
ay vistz vestitz
e ben garnitz.
L’alb’ e·l jorns
clars et adorns
ven. Dieus, aydatz!
L’alba par
e·l jorn vey clar
de lonc la mar
e l’alb’ e·l jorns par.
III.
Be velhatz
e gaytatz,
gayt’; encars
no·ns ven nuls esmays
Non crezatz
per armatz
que jogars
de mon amic lays,
qu’e mon bratz
jauzen jatz;
mas l’afars
no·us iesca del cays.
S’autr’ o ditz,
faitz n’esconditz
soven plevitz.
L’alb’ e·l jorns
clars et adorns
ven. Dieus, aydatz!
L’alba par
e·l jorn vey clar
de lonc la mar
e l’alb’ e·l jorns par.