I.
Je chantasse d'amorettes,
s'en eüsse l'aqoison;
mais se je faz chansonettes,
ceu sera contre raison:
femes sont mais trop noblettes
et trop de fauseté brettes;
Amors n'ont mais que lo non.
Amors ont malvais renon,
car li riche al cuer felon
sont amé por faire don,
et li cortois povres hom
aime seus.
anieus
est li povres envieus.
II.
Qui vuet avoir la baillie
de s'amie a son talant,
bien gart k'avers ne soit mie,
mais penst que il doint sovent
cotte, mantel a s'amie,
peliçon et sosquenie
et chascuns mois garnement
et tot quank'ele despent
et que cele ait de l'argent!
Qui lo plait fait autrement,
n'i trueve l'on nul samblant
amerous
ne pitous
ne plaisant ne delitous.
III.
N'i vaut mais riens cortesie
ne biautez ne biaus ators.
nuns ne puet avoir amie,
tant i sache faire tors,
se sa borse ne deslie.
Amors lo povre home oblie,
ne li plaist pas ses sejors,
puis qu'il ne puet tenir cors.
li riches n'iert ja si lors,
ne tant avules ne sors
k'il ne soit, hui est li jors,
gracious.
Anious
est li povres envious.
IV.
Se c'est que fenme vos die:
- je vos aim -, nel creez ja!
Fenme est plaine de boisdie:
nature li ajuga;
en mal panser est norrie.
S'ele tant fait que vos rie,
en riant vos decevra,
ne ja ne vos amera,
se l'avoir non qu'ele en a.
La costume en est pieça:
ses cuers va or ci, or la,
en mainz leus,
corageus
et tornanz et outrageus.