I.
Sospris sui d'une amorette
d'une jone pucelette:
bele est et blonde et blanchette
plus que n'est une erminette,
s'a la color vermeillette
ensi com une rosette.
II.
Itels estoit la pucele,
la fille au roi de Tudele;
d'un drap d'or qui reflambele
ot robe fresche et novele:
mantel, sorcot et gonele
mout sist bien a la donzele.
III.
En son chief sor ot chapel d'or
ki reluist et estancele;
saphirs, rubiz i ot encor
et mainte esmeraude bele.
Biaus Deus, et c'or fusse je or
amis a tel damoisele!
IV.
Sa ceinture fu de soie,
d'or et de pieres ovree;
toz li cors li reflamboie,
ensi fut enluminee.
Or me doist Deus de li joie,
k'aillors nen ai ma panseie!
V.
G'esgardai son cors gai,
qui tant me plaist et agre[e].
je morrai, bien lo sai,
tant l'ai de cuer enameie!
Se Deu plaist, non ferai,
ainçois m'iert s'amors donee!
VI.
En un trop bel vergier
la vi cele matinee
juer et solacier;
ja par moi n'iert obliee,
car bien sai, senz cuidier,
ja si bele n'iert trovee.
VII.
Lez un rosier s'est assise,
la trés bele et la sennee;
ele resplant a devise,
com estoile a l'anjornee;
s'amors m'esprent et atise,
qui enz el cuer m'est entree.
VIII.
El regarder m'obliai,
tant qu'ele s'en fu alee.
Deus! tant mar la resgardai,
quant si tost m'est eschapee,
que ja mais joie n'avrai,
se par li ne m'est donee!
IX.
Tantost com l'oi regardee,
bien cuidai qu'ele fust fee.
Ne lairoie por riens nee
qu'encor n'aille en sa contree,
tant que j'aie demandee
s'amor, ou mes fins cuers bee,
X.
Et s'ele devient m'amie,
ma granz joie iert acomplie,
ne je n'en prendroie mie
lo roialme de Surie,
car trop meine bone vie
qui aime en tel seignorie.
XI.
Deu pri qu'il me face aïe,
que d'autre nen ai envie.