I.
D'autra guiza e d'autra razo
m'aven a chantar que no sol,
e no·us cuges que de mon dol
esper a far bona chanso,
mas mestier m'es qu'ieu fassa merceiar
a mans, chantan leis que m'encolp'a tort,
qu'ieu n'ai lezer qu'estiers non parl'a tres.
II.
Merce dei trobar e perdo
si·l dreitz uzatges no·m destol
tal que de merceiar no·m col:
ja salvet Merce lo lairo
que autre be no·l podia salvar;
ieu non ai plus vas ma vida confort
que, si·l dreit c'ai no·m val, vailla·m Merces.
III.
Donc a hom dreg en amor? No,
mas cujarion-s'o li fol;
qu'ela·us encolpara, si·s vol,
car li Frances no son Gasco
e car la naus frais ans que fos a Bar:
las, per aital colpa sui pres de mort,
que d'als, per Crist, no sai qu'ieu tort l'agues.
IV.
Ar conosc ieu e sap mi bo
c'om no·s part leu de so que vol,
ans n'a cor plus humil e mol
si tot l'estrai un temps son do:
per mi·us o dic c'anc no puec dezamar
sela que·m tol del tot joi e deport,
ans m'afortis ades on peger m'es.
V.
Huei mais, senhor e companho,
per Dieu, ans que del tot m'afol,
preiatz leis don m'amor no·s tol
que n'aia merce com del so,
e diguas tug, pus no l'aus nomenar:
bela, prendetz per nos n'Arnautz en cort
e no metatz son chantar en deves.