I.
Sols sui qui sai lo sobrafan qe·m sortz
al cor, d’amor sofren per sobramar,
car mos volers es tant ferms et entiers
c’anc no s’esduis de celliei ni s’estors
cui encubic al prim vezer e puois;
c’ades ses lieis dic a lieis cochos motz,
puois qan la vei non sai, tant l’ai, que dire.
II.
D’autras vezer sui secs e d’auzir sortz,
q’en sola lieis vei et aug et esgar;
e ies d’aisso no·ill sui fals plazentiers
que mais la vol non ditz la boca·l cors;
q’ieu no vau tant chams, vautz ni plans ni puois
q’en un sol cors trob aissi bos aips totz:
q’en lieis los volc Dieus triar et assire.
III.
Ben ai estat a maintas bonas cortz
mas sai ab lieis trob pro mais que lauzar:
mesur’ e sen et autres bos mestiers,
beutat, ioven, bos faitz e bels demors,
gen l’enseignet Cortesi’ e la duois;
tant a de si totz faitz desplazens rotz
de lieis no cre rens de ben si’ a dire.
IV.
Nuills gauzimens no·m fora breus ni cortz
de lieis, cui prec q’o vuoilla devinar,
que ia per mi non o sabra estiers
si·l cors ses digz no·s presenta de fors;
que ies Rozers, per aiga qe l’engrois,
non a tal briu c’al cor plus larga dotz
no·m fassa estanc d’amor, qan la remire.
V.
Iois e solatz d’autra·m par fals e bortz,
c’una de pretz ab lieis no·is pot egar,
qe·l sieus solatz es dels autres sobriers.
Hai! Si no l’ai, las! Tant mal m’a comors!
Pero l’afans m’es deportz, ris e iois,
car en pensan sui de lieis lecs e glotz:
hai Dieus, si ia’n serai estiers gauzire!
VI.
Anc mais, so·us pliu, no·m plac tant treps ni bortz
ni res al cor tant de ioi no·m poc dar
cum fetz aquel, don anc feinz lausengiers
no s’esbrugic, q’a mi sol so·s tresors.
Dic trop? Eu non, sol lieis non si’ enois.
Bella, per Dieu, lo parlar e la votz
vuoill perdre, enans que diga ren qe·us tire.
VII.
Ma chanssos prec que no·us sia enois,
car si voletz grazir lo son e·ls motz
pauc prez’ Arnautz cui que plass’ o que tire.