I.
En mai, quant li rossignolez
chante cler ou vert boissonet,
lors m'estuet faire un flajolet,
si le ferai d'un saucelet,
qu'il m'estuet d'amors flajoler
et chapelet de flor porter
por moi deduire et deporter,
qu'adès ne doit on pas muser.
II.
L'autr'ier en mai, un matinet,
m'esveillerent li oiselet,
s'alai cuillir un saucelet,
si en ai fait un flajolet;
mais nuns hons n'en puet flajoler,
s'il ne fait par tout a loer
en bel despendre et en amer
sanz faintise et sanz guiler.
III.
Gravier, cui je vi joliet,
celui donrai mon chapelet.
De bel despendre s'entremet,
en lui nen a point de regret,
et por ce li vuil je doner
qu'il ainme bruit et hutiner
et ainme de cuer sanz fauser;
ensi le covient il ovrer.
IV.
La damoisele au chief blondet
me tient tot gay et cointelet;
en tel joie le cuer me met
qu'il ne me sovient de mon det.
Honiz soit qui por endeter
laira bone vie a mener!
Adès les voit on eschaper,
a quel chief qu'il doie torner.
V.
L'en m'apele Colin Muset,
s'ai maingié maint bon chaponnet,
mainte haste, maint gastelet
en vergier et en praelet,
et quant je puis hoste trover
qui vuet acroire et bien preter,
adonc me preng a sejorner
selon la blondete au vis cler.
N'ai cure de roncin lasser
après mauvais seignor troter:
s'il heent bien mon demander,
et je, cent tanz, lor refuser.