| Diplomatica | Interpretativa |
|
Au comenchier de ma nouelle amor |
Au comenchier de ma novelle amor, ferai cançon k’il m’en est pris talens et proierai a celi qui j’aor, puis ke del tot li sui obediens; por Dieu li proi ne mi soit desdaignans, ains dainst valoir ke par moi soit servie, si en serai plus lies tote ma vie. Je ne me doit nus tenir a folour, se je desir estre ses biens voillans, puis ke beautes fait de li mireor et ens tos biens est chis entendemens; Diex! Com serai envoisies et joiens, Se ja nul jor vers moi tant s'umelie, ke par son gre l'ose apeller amie. Je me delit ens l’espoir ke j'en ai, si dochement, k’il m'est sovent avis kele me doinst s'amor de cuer verai, mais tost men est chis dois espoirs failis; ke de pavor sui mal et esbahis, tant doc raison se ele i met s’entente, sans estre ames criem morir en atente. Et nonporquant ades la servirai, sans estre ames come loiaus amis, ke mis fins cuers ne doit estre en esmai, puis ke il est en haute amor assis; ainz doit penser coment soit deservis, li tres grans biens ou il a mis s’entente, ne ja nul jour por mal ne sen repente. Il m’est avis ki adroit velt jugier, ke nul amans ne doit d'amors partir; k’en poi d’eure rent ele tel loier, ke nus n’aroit pooir de deserver; por cou la voil boinement obeir, et voil proier a ma dame honoree, k' avoc beaute soit pities assamblèe. Quens de Guelle riens ne puet avanchier tant com amors celui ki a li bée. Entendes s’iert vostre honors doblée. |