|
|
I |
| Rassa, mes se son primier en la fin qe an parlada li seingnor e·l mainaider e·l baron de l’encontrada. E s’il fan vas nos estrada, et eu cal mal vos en mer que terra non ai cobrada? |
|
| II | |
| Cadan me laisson deirer quan man mes en la mesclada li gentil e li lainer. Puois q’an man ma terra ermada e arsa et abrasada dison cel del Colonbier qu’en prenga dretz, si m’agrada. |
|
| III | |
| Nos som tal .xxx. guerrer: chascuns ab capa traucada, tuit seingnor e parsoner per cor de guerra mesclada, qu’anc no·n cobren dinerada; ans als colps quan es mestier an lor querreila prestada. |
|
| IV | |
| Qui mai seran ric porter que tenran porta seirada, e sabran arbalester que la patz en l’encontrada c’om non lor daria soudada. Et auran aisil lebrer del comte s’amor privada. |
|
| V | |
| Austor e falco gruer, lors e tabors encuirada, li braquet e·l liamer, arc e sagita barbada, guarnacha larga, foudrada, et osas de Salaver seran mai de lor mainada. |
|
| VI | |
| Cercat ai de Monpellier tro lai part la mar salada, que non trob baron entier aia proessa acabada, qu’el miegluec no sie oschada o fratsa en lor cartier ni mais .j. no mi agrada. |
|
| VII | |
| Bona domna, a Dieu vos quier, que tant vos ai desiranda que mort m’an li desirer avinen domna presada. |
|
| VIII | |
| Na Tempres, genser m’agrada que m’a per so messagier del nom la rason cellada. |