I.
Era m’agr’ ops que m’aizis
de tal chanson qe·m grazis
la bella per cui soi gais;
car no·n cuig ja nuills hom mais
sia d’adreich’entendenssa;
tant los vei totz enveios
c’a penas en conosc dos
vas Joi ses cal que faillenssa.
II.
Neis cels q’ieu tengra per fis
trop lausengiers e devis
e poignon c’amors abais,
don dompnas an tals esglais
qe de veraia temenssa
laisson mains faitz bels e bos,
que lor for’ honors e pros,
si Jois trobes mantenenssa.
III.
E·n vauc enbroncs et enclis,
c’ades tem de mos vezis
qe·m digan so don m’irais;
c’aissi·m venon tuich d’eslais
dire ma greu malsabenssa
e so m’en tant enojos
c’a pauc m’agron fait jelos,
si no·m sobres conoissensa.
IV.
Puois membra·m cum s’afortis
dompna, cui bos pretz noiris,
lai on plus li sortz esmais.
Ab sol q’ella no·is biais
de sa bona chaptenenssa,
no·ill pot dampnar fals ressos;
c’apres ve·il bona razos
et es dreitz que·l vers o venssa.
V.
Dompnas an lor dan enquis;
qe l’una l’autr’ escarnis,
que de mains janglars savais
rizon e fan col e cais.
Mas pauc val, a ma parvenssa,
solatz q’es d’avols sermos,
si de plazers amoros
non fenis e non comenssa.
VII.
Amiga, per vos languis,
per vos muor, e si·m gueris,
totz temps vos serai verais
qe·l bes e l’onors e·l jais
e·l sabers e la sciensa
q’ieu ai, m’aven tot per vos,
e s’enqueras mielhs i fos,
vostra fora·l mais valenssa!
VIII.
Mais d’Amic, ma conoissenssa
toilla·m Dieus, si·m part de vos
Miraval ni mas chansos;
qe·l vostre tortz vuoill qe·m venssa.
IX.
Mantels, vostra beutatz genssa
e vostre pretz es tant bos
que dels malvatz e dels pros
n’avetz laus e benvolenssa.
X.
Pastoretz, gran malvolenssa
avetz de mainz rics baros,
car los faitz totz estar jos
e pojatz vostra valenssa.