I.
Grans mestiers m’es razonamens
qu’ieu a Mataplana envi,
pois N’Ugetz m’a mes el cami
de dire motz braus e cozens.
E car m’a ses desfianssa
cantat sol per devinanssa
d’aisso don eu non sui gair’ encolpatz,
mas trop n’a pres gran gatge
segon q’ieu ai faich petit de follatge.
II.
Anc trobars no·m fon desplazens,
ni chan ni solatz non desfi,
ni moiller non longiei de mi
per conseill de menudas gens;
q’ieu non ai d’als esperanssa
mas d’amor et alegranssa,
et en dompnei ai mes tans bels percatz
e tant cortes usatge,
qe·il drut de sai m’en porton seignoratge.
III.
Ja nuills Catalans avinens
no·s taing per aisso m’atahi,
que cavalliers q’en pretz se fi
deu laissar, so·ns mostra jovens,
moiller que pren per enfanssa;
mas si sa dompna l’enanssa
tant qe·l prenda, estre deu estacatz
d’un certan homenatge,
qe ja nuill temps non seg’ autre viatge.
IV.
Ja·l reproviers non l’er garens
a N’Huget qe·m dis en lati;
que de lui dizon siei vezi
q’en aisso es desconoissens,
qe per amor de Na Sanssa
estai, c’aillors no·is bobanssa;
e puois q’el vol estre totz moilleratz,
ja no·i aiam dampnatge
nos autre drut que seguem dreich viatge.
V.
La dompna q’es bell’ e plazens
lais Dieus venir lai on hom ri,
et el nostr’alberc atressi
nos don cortejadors plazens
ab moiller qe·ns fass’ honranssa;
et ieu non ai d’als fianssa,
mas dels bels digz ab avinen solatz
e l’amoros visatge
qe son dels huoils al cor privat messatge.
VI.
Na Sanssa, dompna, prec vos qe castiatz
N’Uget de dir follatge,
q’ieu·m lais per vos que plus fort no l’engatge.