I.
Forniers, per mos enseignamens,
auch dir, q’etz sai a mi vengutz;
e pois Dieus fai per vos vertutz
qe·us voletz partir dels sirvens,
be·is taing assatz
que aprendatz
cum vos formatz
entre·ls prezatz
e que siatz
bos chantaire.
II.
Ops vos er tot primieiramens
c’oblidetz lanss’ e dartz agutz;
ospitals e monges tondutz
e totz homes obediens
asseguratz
que no·ls prendatz;
jazers els blatz
si’ oblidatz
ab mains pechatz
que fai laire.
III.
Los laitz deschausitz sagramens
qe faziatz, qand eratz nutz
delonc lo taulier remasutz,
e los vilans motz recrezens,
amics, laissatz,
qe no·ls fassatz
ni no·ls digatz;
que grans pechatz
es, so sapchatz,
a retraire.
IV.
Ancar non sai vas cal dels vens
iretz, tro que siatz mogutz,
mas ben vuoill qe·m portetz salutz
a·N Raimon Drut q’es tant valens;
que s’i anatz,
segurs siatz
q’encavalgatz
vos en partatz,
anz qe iscatz
del repaire.
V.
E si·us enqier dels vostres sens,
amics, non estetz esperdutz,
digatz q’a Lombers etz ahutz
a N’Alazais q’es tant plazens,
qe sa beutatz
fai·ls fols e·ls fatz
tornar senatz,
e·ls plus menbratz
outracujatz
de vejaire.
VI.
Joglars siatz
e meitadatz
sens ab foudatz;
c’om trop senatz
entre·ls prezatz
non val gaire.
VII.
Los pros lauzatz,
e dels malvatz
non retengatz
lor amistatz,
qe pieitz prendatz
c’us trichaire.