I.
Enquer non a guaire
que m’era vejaire
que ja no m’alegres d’oguan
tan que fos chantaire;
mas no·m puesc mais traire
qu’ieu no·m complanh’en un nou chan,
quar li ramelh vaire
e l’auzelh qu’aug braire,
van quasqus mon cor conortan
del mal que·m fai traire
midons, la belhaire
del mon, per qu’ieu muer deziran.
Ailas! tan amoros semblan
mi mostret al primier deman;
mas aras ilh m’o va comjan
quan s’i degra mielhs trair’ enan,
et ieu cum leyals amaire
clam merce e dur l’afan.
II.
Si·lh sui di bon aire,
francs e merceyaire,
e no vuelh conoisser mon dan,
per que·m vol estraire
lo ben que·m sol faire
ni·m va son belh solatz lunhan?
Qu’ieu no·m puosc atraire
vas autre repaire,
qu’ela·m fetz tornar en soan
tal don sui peccaire.
Donc si·m vol desfaire,
guardatz si non l’er malestan;
qu’ieu no·l serai guerriers per tan,
mas tostemps m’en irai claman
e planherai lo joi d’antan
qu’ai perdut per lo sieu dous man.
Pero no·m pot hom retraire
qu’anc sai ni lai fes enguan.
III.
Messatgier belh fraire,
per l’arma ton paire,
a ma domna vai dir chantan
qu’ieu no·lh sui trichaire
fals drutz ni bauzaire
que m’an vas tropas partz viran,
mas bos suffertaire
e non gualiaire
que per be fag no·m vau vanan,
qu’aissi quo·l moix laire
son quetz e celaire
qu’om no vuelh sapcha mon talan.
Passat son cinc mes et dui an
qu’elha·m retenc a son coman
mais ben leu non o fetz baizan.
Mas ara dic rizen gaban
qu’ops l’es que vas me s’esclaire
o que del tot me desman.
IV.
Lial, Miravalh e mon chan
tenh de Mon Mantelh derenan
e sospir quar no·l sui denan,
tant ai del vezer gran talan.
Pero non triguara guaire
qu’a Mon Audiart no·m n’an.