I.
Ben sai que per aventura
m’es venguda·il razos q’ieu ai;
que chans d’auzel ni verdura
ni flors d’abril ni ros’ en mai
no m’agr’ ogan tornat en jai,
si d’Amor, que tot’ira vens,
no·m vengues alcus gauzimens,
per qe·il dei tot mon joi grazir.
II.
Tot lo maltraich e l’endura
e·l lonc desirier e l’esmai
conosc qu’eras m’adrechura
cill que m’a donat maint esglai.
Que val amors, s’om mal no·n trai?
Que la jelosi’ e·l turmens,
q’ieu n’aic, e·l angoiss’ e·l talens
mi fant doblamen esgauzir.
III.
Drutz, qui soven se rancura
e tot enquer cant sidonz fai,
si conquier amor, no·il dura;
car non sap co·is ve ni co·is vai;
que dompna promet et estrai
e ditz mainz plazers avenens
per tal q’entre las bonas gens
vuoill’ om totz sos pretz enantir.
IV.
S’autr’entendeire s’atura,
preian midonz que l’am ni·l bai,
tort i fai e desmesura,
mentre que de m’amor s’apai,
qu’il ne fai lo, so que s’eschai,
don ieu li rend merces cinc cens,
e pois mieus es totz l’onramens,
cui cal, si·l fols s’i vol aunir?
V.
A totz iorns creis e meillura
e si val tant que non pot mai
la bella que m’asegura
de s’amor, on non faillirai.
Lonc temps m’a tengut en assai
e s’ie·n crezes sos malvolens
per so qu’eras sai q’es niens,
be·m pogr’ a tort de liei partir.
VI.
Dompn’, ieu sui d’aital natura
q’en la sazon, qe mieills m’estai,
sui ves tota creatura
plus francs, e·n ves vos o serai;
c’on plus mi tenretz coind’ e gai,
vos puosc far mil vers sagramens
q’ie·us serai plus obediens
e·us en volrai mil tans servir.
VII.
Mais d’Amic, pretz vos es e sens,
si voletz mos enantimens;
c’anc Miravals no·us volc faillir.
VIII.
Mantel, qui partis engalmens
vostres adreitz chaptenemens,
cent dompnas en pogra garnir.
IX.
Pastoret, vostres malvolens,
on que sion, vuoill far sabens
q’ieu non am ren qe vos azir.