I.
Bel m’es q’ieu chant e coindei
pois l’aur’ es dous’ e·l temps gais,
e per vergiers e per plais
aug lo retint e·l gabei
que fant l’auzeillet menut
entrel vert e·l blanc e·l vaire;
adoncs se deuri’ atraire
cel qe vol c’amors l’ajut
vas chaptenenssa de drut.
II.
Eu non sui drutz mas dompnei,
ni non tem pena ni fais,
ni·m rancur leu ni m’irais,
ni per orguoill no m’esfrei;
pero temenssa·m fai mut,
c’a la bella de bon aire
non aus mostrar ni retraire
mon cor qu·ill tenc rescondut,
pois aic son pretz conogut.
III.
Ses preiar e ses autrei
sui intratz en greu pantais
cum pogues semblar verais
si sa gran valor desplei,
q’enqer non a pretz agut
dompna c’anc nasqes de maire
qe contra·l sieu valgues gaire;
e si·n sai maint car tengut
que·l sieus a·l meillor vencut.
IV.
Ben vol q’om gen la cortei,
e platz li solatz e jais,
e no·ill agrad’ om savais
que s’en desgui ni fadei.
Mas li pro son ben vengut,
cui mostra tant bel vejaire,
si qe chascus n’es lauzaire
qan son d’enan lieis mogut,
plus qe s’eron siei vendut.
V.
Ja non cre c’ab lieis parei
beutatz d’autra dompna mais,
que flors de rosier qan nais
non es plus fresca de lei,
cors ben fait e gen cregut,
boch’ et oills del mon esclaire;
c’anc Beutatz plus no·i saup faire,
se·i mes tota sa vertut
qe res no·il n’es remasut.
VI.
Ja ma dompna no·is malei
s’ieu a sa merce m’eslais,
q’ieu non ai cor qe·m abais
ni vas bass’amor desrei,
c’ades ai del mieills volgut
defors e dins mon repaire;
e de lieis non sui gabaire,
que plus no·i ai entendut
mas gen m’acuoill’ e·m salut.
VII.
Chanssos, vai me dir al rei
cui jois guid’ e vest e pais,
q’en lui non a ren biais,
c’aital cum ieu vuoill lo vei;
ab que cobre Montagut
e Carcasson’ el repaire,
pois er de pretz emperaire,
e doptaran son escut
sai Frances e lai Masmut.
VIII.
Dompn’ ades m’avetz valgut
tant que per vos sui chantaire;
e no·n cuiei chanson faire
tro·l fieu vos agues rendut
de Miraval q’ai perdut.
IX.
Mas lo reis m’a covengut
que·l cobrarai anz de gaire,
e Mos Audiartz Belcaire:
puois poiran dompnas e drut
tornar el joi q’ant perdut.